ပြည်နယ်နှင့်တိုင်း အသီးသီးရှိ ပြည်သူများအတွက် ဆန်အိတ်ပေါင်း ၂၁၀၀၀ ကို ကမ္ဘောဇဘဏ်က ထပ်မံလှူဒါန်း

ကမ္ဘောဇဘဏ်သည် နေပြည်တော် ကောင်စီနယ်မြေ အပါအဝင် ပြည်နယ်နှင့် တိုင်းဒေသကြီး ၁၅ ခု ရှိ အခြေခံ လူတန်းစား ပြည်သူများသို့ ပေးဝေလှူဒါန်းနိုင်ရန်အတွက် ငွေကျပ်သိန်း ၆၀၀၀ ကျော် တန်ဖိုးရှိ ဆန်အိတ်ပေါင်း ၂၁၀၀၀ ကို COVID-19 ထိန်းချုပ်ရေးနှင့် အရေးပေါ်တုံ့ပြန်ရေးကော်မတီသို့ ဧပြီလ ၁၃ ရက်နေ့တွင် ပေးအပ် လှူဒါန်းခဲ့ကြောင်း သိရသည်။

.

အဆိုပါ ဆန်အိတ်ပေါင်း ၂၁၀၀၀ ကို  ပြည်နယ်နှင့် တိုင်းဒေသကြီး အသီးသီးရှိ အခြေခံ လူတန်းစား ပြည်သူများထံသို့  COVID-19 ထိန်းချုပ်ရေးနှင့် အရေးပေါ်တုံ့ပြန်ရေးကော်မတီက ဆက်လက် ပေးပို့ လှူဒါန်းလျက် ရှိကြောင်း သိရသည်။

.

ကမ္ဘောဇဘဏ်မှ လှူဒါန်းသည့် ဆန်အိတ်များကို နေပြည်တော်ကောင်စီ နယ်မြေ၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ ချင်းပြည်နယ် ၊  မွန်ပြည်နယ် ၊ ရခိုင်ပြည်နယ်၊  စစ်ကိုင်းတိုင်းဒေသကြီး ၊ မကွေးတိုင်းဒေသကြီး ၊ ပဲခူးတိုင်းဒေသကြီး ၊ ဧရာဝတီတိုင်းဒေသကြီး ၊ တနင်္သာရီတိုင်းဒေသကြီး တို့အတွက် ဆန်အိတ် ၁၀၀၀ စီနှင့် ရှမ်းပြည်နယ် ၊ မန္တလေးတိုင်းဒေသကြီး၊ ရန်ကုန်တိုင်းဒေသကြီး တို့အတွက် ဆန်အိတ် ၃၀၀၀ စီ ဖြန့်ဝေ လှူဒါန်းမည် ဖြစ်ကြောင်း သိရသည်။

.

ကမ္ဘောဇဘဏ်သည် KBZ MS General Insurance၊ KBZ Life၊ Myanmar Airways International (MAI) ၊ Air KBZ တို့နှင့် အတူ COVID-19 ကာကွယ်၊ ထိန်းချုပ်၊ ကုသရေးအတွက် ငွေကျပ် သိန်းပေါင်း ၃၁၂၁၄ သိန်းကို လှူဒါန်းခဲ့ပြီး ဖြစ်ကာ ကျန်းမာရေးနှင့် အားကစားဝန်ကြီးဌာနနှင့်အတူ တစ်နိုင်ငံလုံး အတိုင်းတာဖြင့် လိုအပ်သည့် နေရာများတွင် ပူးပေါင်း ပါဝင် လှူဒါန်းသွားရန် စီစဉ်ဆောင်ရွက်ထားကြောင်း သိရသည်။

.