အကျဉ်းသားများ လွှတ်ပေးရန်နှင့် စစ်ဘေးရှောင်များ နေရပ် ပြန်နိုင်ရေးအတွက် တိုက်ပွဲများ ရပ်တန့်ရန် ILAM က မေတ္တာရပ်ခံ

မင်းဇော်မင်း

.

အကျဉ်းသားများ လွှတ်ပေးရန်နှင့် စစ်ဘေးရှောင်များ နေရပ်ပြန်နိုင်ရေး တိုက်ပွဲများ ရပ်တန့်ရန်  အတွက် နိုင်ငံတော်အတိုင်ပင်ခံပုဂ္ဂိုလ်၊ တပ်မတော် ကာကွယ်ရေးဦးစီးချုပ်နှင့် တိုင်းရင်းသား လက်နက်ကိုင် အင်အားစုများအားလုံးသို့ မြန်မာနိုင်ငံ လွတ်လပ်သော ရှေ့နေများအသင်း(ILAM)က မေတ္တာရပ်ခံ ပန်ကြားချက်အား ဧပြီလ ၁ ရက်တွင် ထုတ်ပြန်ခဲ့ကြောင်း သိရသည်။

.

“ အဓိကတော့ အကျဉ်းသားတွေ လွှတ်ပေးဖို့ဆိုရင်လည်း သမ္မတက လုပ်ပေးနိုင်ပေမဲ့ စစ်ဘေး ဒုက္ခသည်တွေကျတော့ အားလုံး ညီညွတ်မှ ရမှာ၊ ခုလာမယ့် ရက်ပိုင်းအတွင်း ရောဂါက စိုးရိမ်စရာ ဖြစ်လာနိုင်လို့ အားလုံး စုပေါင်းပြီး လုပ်ဆောင်နိုင်ဖို့ မေတ္တာရပ်ခံရခြင်း ဖြစ်ပါတယ်” ဟု

မြန်မာနိုင်ငံ လွတ်လပ်သော ရှေ့နေများအသင်း(ILAM)၏ အထွေထွေ အတွင်းရေးမှူး ဦးသိန်းသန်းဦးက ကမ္ဘောဇတိုင်းသို့ ပြောသည်။

.

မြန်မာနိုင်ငံလွတ်လပ်သောရှေ့နေများအသင်း(ILAM)၏ ထုတ်ပြန်ချက်တွင် COVID-19 ရောဂါပိုး ကူးစက်ခံရပါက အကြီးအကျယ် ထိခိုက်နစ်နာမည့်သူများမှာ အကျဉ်းထောင်ရှိ အကျဉ်းသားများနှင့် စစ်ဘေးရှောင် ဒုက္ခသည်များသည်များ ဖြစ်ခြင်းကြောင့် အစိုးရနှင့် တာဝန်ရှိသူများအနေဖြင့် အကျဉ်းထောင်ရှိ အကျဉ်းသားဦးရေကို လျော့ချခြင်း၊ အမှုရင်ဆိုင်ဆဲ အချုပ်သားများကို ကျယ်ကျယ်ပြန့်ပြန့် အာမခံပေးခြင်း၊ အကန့်အသတ်ဖြင့် လွတ်ငြိမ်းချမ်းသာခွင့် ပေးခြင်း၊ အကန့်အသတ်မရှိ လွတ်ငြိမ်းချမ်းသာခွင့် ပေးခြင်း စသည့် နည်းလမ်းမျိုးစုံဖြင့် ဆောင်ရွက်နိုင်သည့် အခြေအနေ ရှိကြောင်း ဖော်ပြပါရှိသည်။

.

ထို့အပြင် တရာခွင်အတွင်း၌ အမှုများ ကြားနားစစ်ဆေးရာတွင် လူအများ ဝင်ထွက် သွားလာကြသည့်အတွက် ရောဂါပိုး ကူးစက်နိုင်သဖြင့် တရားခွင်အတွင်း အမှုစစ်ဆေး ကြားနာခြင်းကိုလည်း ကာလကန့်သတ်ရွှေ့ဆိုင်းသင့်ကြောင်းနှင့် စစ်ဘေးရှောင်ပြည်သူများ ငြိမ်းချမ်းစွာ အိမ်ပြန်နိုင်ရေးအတွက် တိုက်ပွဲများ ချက်ခြင်း ရပ်ဆိုင်းပြီး နှစ်ဘက် လက်နက်ကိုင် အဖွဲ့များ၏ သဘောထားကြီးမှုဖြင့်သာ အကောင်အထည်ဖော် ဆောင်ရွက်နိုင်မည်ဟုလည်း ဖော်ပြထားသည်။

.

ထို့အတူ အရပ်ဘက် ဆေးပညာရှင်များ၊ ဆေးရုံများသာမက တပ်မတော်ဆေးဘက်ပညာရှင်များ၊ တပ်မတော်​ ဆေးရုံများ၊ ကျွမ်းကျင်ပညာရှင်များ စုပေါင်း ကြိုတင် ကာကွယ်ကြကာ လက်တွဲညီညီ ကယ်တင်ကြမှသာလျှင် ကပ်ဘေးဆိုးကို ကျော်လွှားနိုင်မည် ဖြစ်ခြင်းကြောင့် သမ္မတ၊ နိုင်ငံတော်၏ အတိုင်ပင်ခံပုဂ္ဂိုလ်၊ ကာကွယ်ရေးဦးစီးချုပ်နှင့် တိုင်းရင်းသား လက်နက်ကိုင် အဖွဲ့အစည်း အားလုံးတို့က တစ်စိတ်တစ်ဝမ်းတည်း ဝိုင်းဝန်း ဆောင်ရွက်ပေးရန် မေတ္တာရပ်ခံ ပန်ကြားအပ်သည်ဟု ဖော်ပြထားကြောင်း သိရသည်။

.

မြန်မာနိုင်ငံ လွတ်လပ်သောရှေ့နေများအသင်း(ILAM)သည် ၂၀၁၆ ခုနှစ်၊ ဇန်နဝါရီလ ၁၉ ရက်တွင် စတင် ဖွဲ့စည်းခဲ့ပြီး ယင်းနှစ် နိုဝင်ဘာလ ၂၈ ရက်တွင် တရားဝင်မှတ်ပုံတင်ခဲ့သော ရှေ့နေများဖြင့် ဖွဲ့စည်းထားသော အဖွဲ့အစည်း ဖြစ်သည်။

.