ဟိုပုံးမြို့နယ်အတွင်း ဝင်ငွေပုံမှန်မရှိသော အိမ်ထောင်စု ၁၅၀၀ ကျော်ကို ဆန်၊ ဆီနှင့် ထောက်ပံ့ပစ္စည်းများ ပေးအပ်သွားမည် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Saturday, April 11, 2020

ဟိုပုံးမြို့နယ်အတွင်း ဝင်ငွေပုံမှန်မရှိသော အိမ်ထောင်စု ၁၅၀၀ ကျော်ကို ဆန်၊ ဆီနှင့် ထောက်ပံ့ပစ္စည်းများ ပေးအပ်သွားမည်


နေမင်းထွန်း (ဟိုပုံး)
.
ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဟိုပုံးမြို့နယ်အတွင်းရှိ ဝင်ငွေပုံမှန်မရှိသော အိမ်ထောင်စု ၁၅၀၁ စုအား ဆန်၊ ဆီ၊ ဆား၊ ပဲနှင့် ကြက်သွန်နီများ ထောက်ပံ့ပေးအပ်သွားမည်ဖြစ်ကြောင်း သိရသည်။
.
 
.
ယင်းကဲ့သို့ ထောက်ပံ့ပစ္စည်းများ ပေးအပ်နိုင်ရေးအတွက် ညှိနှိုင်းအစည်းအဝေးကို ယနေ့ ဧပြီလ ၁၁ ရက်၊ နံနက်ပိုင်းက ဟိုပုံးမြို့နယ် အထွေထွေအုပ်ချုပ်ရေးဦးစီးဌာန အစည်းအဝေးခန်းမတွင် ပြုလုပ်ခဲ့သည်ဟု သိရသည်။
.
“အိမ်ထောင်စု စုစုပေါင်း ၁၅၀၁ စု ရှိပါတယ်။ ဒီနေ့ပဲ ရွာတွေအရောက် သွားပို့နေကြပါတယ်။ ငွေသားမပေးပါဘူး။ ပစ္စည်း ၅ မျိုးပဲ ပေးတာပါ” ဟု ဟိုပုံးမြို့နယ်အုပ်ချုပ်ရေးမှူး ဦးနန်းတင့်က ကမ္ဘောဇတိုင်းသို့ ပြောသည်။
.
အစည်းအဝေးတွင် ဟိုပုံးမြို့နယ်အုပ်ချုပ်ရေးမှူး ဦးနန်းတင့်က ဝင်ငွေပုံမှန်မရှိသော အိမ်ထောင်စုများအား ထောက်ပံ့ နိုင်ရေး အစီအမံကို ရှင်းလင်းပြောကြားခဲ့ပြီး မြို့နယ်ကျန်းမာရေးဦးစီးဌာနမှူး ဒေါက်တာခင်မောင်သိန်းက COVID-19 ရောဂါ ကြိုတင်ကာကွယ်ရေးအတွက် ဆောင်ရွက်မည့် လုပ်ငန်းစဉ်များကို ရှင်းလင်းပြောကြားခဲ့သည်။
.
ထို့နောက် ဟိုပုံးမြို့နယ် မဲဆန္ဒနယ်အမှတ် (၁) မှ ရှမ်းပြည်နယ်လွှတ်တော်ကိုယ်စားလှယ် ဦးခွန်မောင်ဖြူက COVID-19 ရောဂါကြိုတင်ကာကွယ်ရေးအတွက် မြို့နယ်အတွင်းဝင်ငွေ ပုံမှန်မရှိသော အိမ်ထောင်စု ၁၅၀၁ စုကို အိမ်ထောင်စု တစ်စုလျှင် ဆန် ၈ ပြည်၊ ဆီ ၅၀ ကျပ်သား၊ ဆား ၅၀ ကျပ်သား၊ ပဲ ၁ ပိဿာနှင့် ကြက်သွန်နီ ၁ ပိဿာ စုစုပေါင်း ထောက်ပံ့ကူညီမှု ၅ မျိုးစီကို အခမဲ့ဖြန့်ဖြူးပေးအပ်ထောက်ပံ့ပေးသွားမည်ဖြစ်ကြောင်း ပြောဆိုကာ ဒုတိယမြို့နယ် အုပ်ချုပ်ရေးမှူး ဦးခွန်ကျော်သိန်းက အလှူရှင်များအား ကျေးဇူးတင်ရှိကြောင်း ပြောဆိုခဲ့သည်။
.
ဟိုပုံးမြို့နယ်အတွင်း ယင်းကဲ့သို့ ထောက်ပံ့လှူဒါန်းနိုင်ရေးအတွက် လုပ်ငန်းရှင်၊ အလှူရှင်များမှ အလှူငွေကျပ် ၄၇ သိန်းကျော် လှူဒါန်းထားပြီးဖြစ်ကြောင်း သိရသည်။
.

No comments:

Post a Comment

Journal Download

Photo of three cats

About