COVID-19 လူနာများကို ကုသပေးနေသည့် ရှမ်းပြည်နယ်ရှိ ကျန်းမာရေးဝန်ထမ်းများကို ပြည်နယ်အစိုးရက ထောက်ပံ့ပေးမည် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Wednesday, April 15, 2020

COVID-19 လူနာများကို ကုသပေးနေသည့် ရှမ်းပြည်နယ်ရှိ ကျန်းမာရေးဝန်ထမ်းများကို ပြည်နယ်အစိုးရက ထောက်ပံ့ပေးမည်

နန်းဝင်းရီ
.
ရှမ်းပြည်နယ်အတွင်းရှိ ဆေးရုံများတွင် ဆေးကုသမှု ခံယူနေသော COVID-19 ပိုးတွေ့ လူနာများအား စောင့်ရှောက် ကုသမှု ပေးနေသည့် ကျန်းမာရေး ဝန်ထမ်းများ၏ နေ့စဉ် စားသောက်ရေးနှင့် လိုအပ်သည့် အားဖြည့်စာများ၊ ဆေးဝါးများအတွက် ကုန်ကျစရိတ်ကို ရှမ်းပြည်နယ်အစိုးရအဖွဲ့မှ ထောက်ပံ့ပေးသွားမည် ဖြစ်ကြောင်း သိရသည်။
.
လူနာများအား စောင့်ရှောက် ကုသမှုပေးနေသည့် ကျန်းမာရေးဝန်ထမ်းများအား ထောက်ပံ့ လှူဒါန်းမှုများ ပြုလုပ်လိုသည့် ပြည်သူများ အနေဖြင့် ဖုန်းနံပါတ် ၀၈၁ ၂၀၁၈၇၀ သို့ ဆက်သွယ် ဆောင်ရွက်နိုင်ကြောင်း ရှမ်းပြည်နယ်အစိုးရအဖွဲ့ ပြောရေးဆိုခွင့် ရှိသူ ပြည်နယ်စီမံကိန်းနှင့် ဘဏ္ဍာရေးဝန်ကြီး စိုးညွန့်လွင်က ၎င်း၏ လူမှုကွန်ရက် စာမျက်နှာတွင် ရေးသားထားသည်။
.

ရှမ်းပြည်နယ်အတွင်း ၌ ယနေ့ ဧပြီလ ၁၅ ရက်၊ နံနက်ပိုင်းအထိ COVID-19  အတည်ပြုလူနာ ၃ ဦး တွေ့ရှိထားပြီး ၎င်းတို့မှာ တောင်ကြီးမြို့၊ စဝ်စံထွန်းဆေးရုံ၌ ဆေး ကုသမှု ခံယူနေသည့် လူနာအမှတ်(၂၉)၊ ရှမ်းပြည် နယ်မြောက်ပိုင်း၊ ကျောက်မဲမြို့မှ လားရှိုးဆေးရုံသို့ လွှဲပြောင်း၍ ဆေးကုသမှု ခံယူနေသည့် လူနာအမှတ် (၁၄) နှင့် ရှမ်းပြည်နယ် အရှေ့ပိုင်း၊ မိုင်းဖြတ်ပြည်သူ့ဆေးရုံမှ ကျိုင်းတုံဆေးရုံသို့ လွှဲပြောင်းရန် စီစဉ်ဆောင်ရွက်လျက်ရှိသည့် လူနာအမှတ် (၆၄) တို့ ဖြစ်ကာ လက်ရှိအချိန်ထိ လူနာ ၃ ဦးလုံး၏ ကျန်းမာရေး အခြေအနေမှာ ကောင်းမွန်နေလျက် ရှိကြောင်း သိရသည်။
.
“ ကျန်းမာရေး ကောင်းပါတယ်။ လူနာ မိသားစုဝင်တွေရဲ့ ဓါတ်ခွဲ နမူနာ အဖြေကို မသိရသေးဘူးဗျ။ ဒါလောက်ပဲ ဖြေလို့ ရမယ်ဗျ။” ဟု တောင်ကြီးမြို့ စဝ်စံထွန်းဆေးရုံ၌ ဆေးကုသမှု ခံယူနေသည့် လူအမှတ် (၂၉)နှင့် ပတ်သက်၍ စဝ်စံထွန်း ဆေးရုံအုပ်ကြီးက ကမ္ဘောဇတိုင်းသို့ ပြောသည်။
.
ရှမ်းပြည်နယ်အစိုးရအဖွဲ့သည် ရှမ်းပြည်နယ် ပြည်သူလူထု စားနပ်ရိက္ခာ ထောက်ပံ့ရေးကော်မတီနှင့် ပူးပေါင်းပြီး အခြေခံ လူတန်းစားများ စားသောက်ရေး အခက်အခဲ ဖြစ်ပေါ်လာပါက ရိက္ခာထုတ်များအား အချိန်နှင့် တစ်ပြေးညီ ဖြန့်ဝေ လှူဒါန်းရန် အသင့် စီစဉ်ထားပြီး  ရှမ်းပြည်နယ် အပါအဝင် မြန်မာနိုင်ငံတစ်ဝန်းတွင် ကျန်းမာရေး အထောက်အကူပြု ပစ္စည်းများကို ဖြန့်ဝေ လှူဒါန်းနေလျက် ရှိကြောင်းလည်း သိရသည်။

No comments:

Post a Comment

Journal Download

Photo of three cats

About