အထူးဒေသ(၄)တွင် ပြည်တော်ပြန် အလုပ်သမား ၂၇၀ ကျော်ကို Facility Quarantine ထားရှိ - Kanbawza Tai News

Breaking

ကမ္ဘောဇတိုင်း သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (၀၁၀၇၉)ဖြင့် ဆောင်ရွက်နေသည့် သတင်းမီဒီယာ ဖြစ်သည်။ contact; kanbawzatai.editor@gmail.com

အထူးဒေသ(၄)တွင် ပြည်တော်ပြန် အလုပ်သမား ၂၇၀ ကျော်ကို Facility Quarantine ထားရှိ


မင်းဇော်မင်း
.
တရုတ်နိုင်ငံမှ ပြန်လည် စေလွှတ်ခံရသည့် ပြည်တော်ပြန် မြန်မာရွှေ့ပြောင်း အလုပ်သမား ၂၇၀ ကျော်ကို အထူးဒေသ(၄) နယ်မြေအတွင်း၌ Facility Quarantine အဖြစ် ၁၄ ရက် နေထိုင်ရန် လွှဲပြောင်း ထားရှိကြောင်း မိုင်းယန်းမြို့နယ် ပြည်သူ့လွှတ်တော်ကိုယ်စားလှယ် ဦးစိုင်းစိန်ထံမှ သိရသည်။
.
“ နိုင်ငံတော်ရဲ့လမ်းညွှန်ချက်အတိုင်း နယ်စပ်က ဝင်လာတဲ့သူတွေ ဖြစ်တဲ့အတွက် သူတို့ လာတဲ့ ဆီလူးမှာ ၁၄ ရက် စောင့်ကြည့်ပြီးမှ မိုင်းယန်းကနေ ဖြတ်သန်းခွင့် ပြုမှာပါ။” ဟု ဦးစိုင်းစိန်က ပြောသည်။
.

အဆိုပါ ပြည်တော်ပြန်များကို ဧပြီလ ၇ ရက် နံနက် ၉ နာရီတွင် မိုင်းယန်းမြို့နယ်ရှိ ဌာနဆိုင်ရာ တာဝန်ရှိသူများက မိုင်းလားအထူး(၄) တာဝန်ရှိသူများထံသို့ လွှဲပြောင်းပေးအပ်ခဲ့ခြင်း ဖြစ်ကာ အမျိုးသား ၁၅၈ ဦး၊ အမျိုးသမီး ၁၁၉ ဦး၊ စုစုပေါင်း ၂၇၇ ဦး ဖြစ်ကြောင်း သိရသည်။
.
၎င်းတို့သည် တရုတ်နိုင်ငံ၊ ယူနန်ပြည်နယ်၊ မုန်းဝေ၊ မုန်းကျို စသည့် မြို့များတွင် အလုပ် လုပ်ကိုင်နေကြရသူများ ဖြစ်ကာ COVID-19 ကြောင့် မြန်မာနိုင်ငံ နယ်စပ် မိုင်းလားသို့ ဧပြီလ ၄ ရက်က ပို့ဆောင်ခံခဲ့ရပြီး ယင်းမှ တဆင့် မိုင်းလားမှ မိုင်းယန်း၊ ဆီလူးနယ်မြေသို့ ဧပြီလ ၆ ရက်တွင် ပို့ဆောင်ခံရခြင်း ပြီးနောက် ဧပြီလ ၆ ရက်က မိုင်းယန်းမြို့နယ် အထွေထွေ အုပ်ချုပ်ရေးဦးစီးဌာန ခန်းမတွင် ပြုလုပ်သည့် အစည်းအဝေး ဆုံးဖြတ်ချက်အရ အဆိုပါ အလုပ်သမားများကို အထူးဒေသ(၄) မိုင်းလားနယ်မြေအတွင်း၌ Facility Quarantine အဖြစ် ၁၄ ရက် ထားရှိပြီးမှ ၎င်းတို့ သွားရောက်မည့် အရပ်ဒေသများသို့ ပို့ဆောင်မည် ဖြစ်ကြောင်း သိရသည်။
.

အထူးဒေသ(၄)သည် ရှမ်းပြည်နယ် အရှေ့ပိုင်း၊ မြန်မာ-တရုတ် နယ်စပ်တွင် တည်ရှိကာ မိုင်းလား၊ ဆီလူး၊ နမ့်ပန်း ဒေသ ၃ ခု ကို အထူးဒေသ(၄) အဖြစ် ၁၉၈၉ ခုနှစ်၊ ဇွန်လ ၃၀ ရက်တွင် အစိုးရက သတ်မှတ်ထားခြင်း ဖြစ်ပြီး ကီလိုမီတာ ၄၉ဝဝ ကျော် ကျယ်ဝန်း၍ ရှမ်း၊ အခါ၊ လွယ်၊ ကိုးကန့် စသည့် တိုင်းရင်းသား လူမျိုး ၁၃ မျိုးခန့် နေထိုင်လျက်ရှိကြောင်း သိရသည်။

Journal Download

Photo of three cats