မြန်မာနိုင်ငံတွင် ၁၁ ရက်အတွင်း COVID-19 လူနာ ၂၀ ဦး တွေ့ရှိ

မြန်မာနိုင်ငံတွင် COVID-19 လူနာ ၄ ဦး ထပ်မံ တွေ့ရှိကြောင်းကို ကျန်းမာရေးနှင့် အားကစား ဝန်ကြီးဌာနမှ ယနေ့ (ဧပြီလ ၂ ရက်)၊ ည ၈ နာရီတွင် ထုတ်ပြန်ခဲ့ရာ ၁၁ ရက်အတွင်း စုစုပေါင်း အတည်ပြုလူနာ ၂၀ ဦး ရှိပြီ ဖြစ်ကြောင်း သိရသည်။

.

အဆိုပါ အတည်ပြုလူနာ ၄ ဦးမှာ ယခင်အတည်ပြုလူနာ အမှတ်(၁၅)ဖြစ်သော အသက် ၄၅ နှစ်အရွယ် အမျိုးသမီး၏ မိသားစုဝင်များ ဖြစ်ပြီး ပဲခူးတိုင်းဒေသကြီး၊ ပေါက်ခေါင်းမြို့ရှိ ၎င်းတို့၏ နေအိမ်တွင် အသွား အလာ ကန့်သတ်၍ စောင့်ကြပ် ကြည့်ရှုပြီး ဓာတ်ခွဲနမူနာ ရယူ၍ စစ်ဆေးခဲ့ရာ COVID-19 ပိုး တွေ့ရှိရခြင်း ဖြစ်ကြောင်း သိရသည်။

.

၎င်းတို့မှာ လူနာ အမှတ်(၁၅)၏ ခင်ပွန်းဖြစ်သူ အသက် ၄၇ နှစ်၊ သားဖြစ်သူ အသက် ၁၀ နှစ်၊ သမီးဖြစ်သူ အသက် ၈ နှစ်နှင့် တူမဖြစ်သူ အသက် ၁၈ နှစ်တို့ ဖြစ်ကာ နေအိမ်မှ သတ်မှတ်ဆေးရုံသို့  လွှဲပြောင်း၍ သီးခြား ထားရှိ ကုသမှု ပေးသွားမည် ဖြစ်ပါသည်။

.

ကျန်းမာရေးနှင့် အားကစားဝန်ကြီးဌာန၏ ယနေ့ ထုတ်ပြန်ချက်တွင် COVID-19 အတည်ပြုလူနာ ၄ ဦး ပါရှိခဲ့ပြီး ကျန်လူနာ ၅၈ ဦးတွင် ရောဂါပိုး မရှိကြောင်းနှင့် ယနေ့တွင် စောင့်ကြည့်လူနာ အသစ် ၄၃ ဦး ရှိကြောင်း ဖော်ပြထားသည်။

.

မြန်မာနိုင်ငံတွင် COVID-19 အတည်ပြုလူနာ ၂၀ ဦးနှင့် ပိုးတွေ့ရှိပြီးနောက် သေဆုံးသူ ၁ ဦး ရှိကာ ပြည်သူ လူထုအနေဖြင့် ရောဂါကာကွယ်ရေး ဆိုင်ရာ ကျန်းမာရေး ပညာပေး အချက်အလက်များအား တိကျစွာ လိုက်နာ ဆောင်ရွက်ရန် ကျန်းမာရေးနှင့် အားကစားဝန်ကြီးဌာနမှ နှိုးဆော်ထားသည်။

.

ကမ္ဘာ့နိုင်ငံနှင့် နယ်မြေဒေသပေါင်း ၂၀၅ ခုတွင် အတည်ပြုလူနာပေါင်း ၈၅၇၆၄၁ ဦးထိ တွေ့ရှိထားကာ ယင်းအနက် သေဆုံးသူမှာ ၄၂၀၀၆ ဦး ရှိကြောင်း WHO ၏ ဧပြီလ ၂ ရက် ထုတ်ပြန်ချက်များအရ သိရသည်။

.