COVID-19 ရောဂါပိုး စစ်ဆေးပေးနိုင်သော စက် ၂ လုံးရှိကြောင်း တပ်မတော် သတင်းထုတ်ပြန် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Saturday, April 25, 2020

COVID-19 ရောဂါပိုး စစ်ဆေးပေးနိုင်သော စက် ၂ လုံးရှိကြောင်း တပ်မတော် သတင်းထုတ်ပြန်


မင်းဇော်မင်း
.
တပ်မတော်တွင် COVID-19 ရောဂါပိုးရှိ/မရှိ တစ်ရက်လျှင် လူ ၁၄၀၀ ခန့် စစ်ဆေးပေးနိုင်သည့် COBAS 6800 စက် ၂ လုံး ရှိကြောင်း ယနေ့ ဧပြီလ ၂၅ ရက်တွင် မြဝတီသတင်းဌာနက သတင်းထုတ်ပြန်ခဲ့သည်ဟု သိရသည်။
.
.
အဆိုပါ စက် ၂ လုံးမှာ ရန်ကုန်မြို့ရှိ အမှတ် (၁) တပ်မတော်ဆေးရုံကြီး (ကုတင် ၁၀၀၀) နှင့် နေပြည်တော်ရှိ အမှတ် (၂) တပ်မတော်ဆေးရုံကြီး (ကုတင် ၁၀၀၀) တို့တွင် ၂၀၁၉ ခုနှစ်ကတည်းက တပ်ဆင်ထားခြင်းဖြစ်ကြောင်း ထုတ်ပြန် ချက်အရ သိရသည်။
.
ယင်း COVAS 6800 စက်များဖြင့် COVID-19 ရောဂါပိုးရှိ/မရှိ စစ်ဆေးရန်အတွက် လိုအပ်သည့် Reagent  များအား မှာယူခဲ့ရာ ယခုအခါ ရောက်ရှိလာပြီဖြစ်သဖြင့် COVID-19 ရောဂါပိုး စစ်ဆေးနိုင်ရန်အတွက် သက်ဆိုင်ရာ ကျွမ်းကျင် ပညာရှင်များနှင့် ဆေးဝန်ထမ်းတပ်ဖွဲ့မှ ပညာရှင်များ ပူးပေါင်း၍ စက်ပိုင်းဆိုင်ရာ လိုအပ်သည့် တပ်ဆင်မှုနှင့် ကြိုတင် ပြင်ဆင်မှုများကို ဧပြီလ ၂၃ ရက်တွင် အောင်မြင်စွာ ဆောင်ရွက်ပြီးစီးခဲ့ပြီဖြစ်သဖြင့် အဆိုပါ စက်များဖြင့် COVID-19 ရောဂါပိုး စစ်ဆေးအတည်ပြုမှုများ ပြုလုပ်ပေးရန် အသင့်ရှိပြီဖြစ်သည်ဟု ထုတ်ပြန်ချက်တွင် ဖော်ပြထားသည်။
.
ထို့အတူ ကျန်းမာရေးနှင့် အားကစားဝန်ကြီးဌာနအတွက်လည်း COBAS 6800 စက်တစ်လုံးအား AA Medical Products Ltd. Pacific-AA Foundation) က လှူဒါန်းထားပြီး ရန်ကုန်မြို့တွင် တပ်ဆင်ရေးလုပ်ငန်းများ ဆောင်ရွက်လျက်ရှိရာ အဆိုပါလုပ်ငန်းများ မပြီးစီးမီနှင့် ပြီးစီးပြီးနောက် လိုအပ်ပါက ရန်ကုန်နှင့် နေပြည်တော်တပ်မတော်ဆေးရုံများရှိ COBAS 6800 စက်များဖြင့် COVID-19 ရောဂါပိုး အတည်ပြုစမ်းသပ်စစ်ဆေးမှုများအား တပ်မတော်မှ ပူးပေါင်းကူညီ ဆောင်ရွက်သွားမည်ဖြစ်ကြောင်း သိရသည်။
.
COBAS 6800 စက်များသည် ကမ္ဘာ့ထိပ်တန်းရောဂါရှာဖွေရေးစက်များ ထုတ်လုပ်သည့် ဆွစ်ဇာလန်နိုင်ငံအခြေစိုက် Roche Diagnostics Co,Ltd မှ ထုတ်လုပ်သည့် နောက်ဆုံးပေါ် ရောဂါရှာဖွေရေးစက် အမျိုးအစားဖြစ်ပြီး အမေရိကန်နှင့် ကမ္ဘာ့နိုင်ငံကြီးများတွင် COVID-19  ရောဂါပိုးရှာဖွေရေးအတွက် လက်ရှိသုံးစွဲလျက်ရှိပြီး အရည်အသွေးဆိုင်ရာ အသိအမှတ် ပြုမှုရရှိပြီးဖြစ်ကြောင်း သိရသည်။
.
အဆိုပါ COBAS 6800 စက်များသည်  Fully Automatic System ဖြစ်သည့်အတွက် တစ်ရက်လျှင် လူဦးရေ ၁၄၀၀ ဦးခန့် အတွက် စမ်းသပ်စစ်ဆေးပေးနိုင်မည်ဖြစ်ပြီး စက်ကိုင်တွယ်သူများအား ရောဂါပိုးကူးစက်နိုင်မှုရာခိုင်နှုန်းနည်းပါးကာ အမြန်ဆုံး၊ အများဆုံးနှင့် အမှန်ကန်ဆုံးစစ်ဆေးပေးနိုင်မည်ဖြစ်ကြောင်း သိရသည်။
.

No comments:

Post a Comment

Journal Download

Photo of three cats

About