.
အဆိုပါ အတည်ပြုလူနာအမှတ်(၂၂)သည် ရန်ကုန်တိုင်းဒေသကြီး၊ တောင်ဥက္ကလာပမြို့နယ်တွင်
နေထိုင်သည့် အသက် ၅၁ နှစ်အရွယ် အမျိုးသမီး ဖြစ်ပြီး လူနာအမှတ်(၂၁)နှင့်အတူ မတ်လ ၂၆
ရက်တွင် အမေရိကန်နိုင်ငံမှ မြန်မာနိုင်ငံသို့ ကိုရီးယား၊ ထိုင်းနိုင်ငံများမှ တဆင့်
ပြန်လည် ရောက်ရှိပြီးနောက် ဗိုလ်တစ်ထောင်မြို့နယ်ရှိ ဟိုတယ် တစ်ခုတွင် အသွားအလာ ကန့်သတ်ခြင်း
ဆောင်ရွက်ထားရှိသူ ဖြစ်ကြောင်း သိရသည်။
.
ယင်းလူနာ အမှတ်(၂၂)အား ဝေဘာဂီ အထူးကုဆေးရုံသို့ လွှဲပြောင်းထားရှိပြီး ဓါတ်ခွဲ
နမူနာအား စစ်ဆေးရာ COVID-19 ပိုး တွေ့ရှိရခြင်း ဖြစ်ကြောင်း သိရသည်။
.
ကျန်းမာရေးနှင့် အားကစားဝန်ကြီးဌာန၏ ယနေ့ ထုတ်ပြန်ချက်တွင် COVID-19
အတည်ပြုလူနာအသစ် ၁ ဦး ပါရှိခဲ့ပြီး ကျန်လူနာ ၄၅ ဦးတွင် ရောဂါပိုး မရှိကြောင်းနှင့်
ယနေ့တွင် စောင့်ကြည့်လူနာ အသစ် ၃၁ ဦး ရှိကြောင်း ဖော်ပြထားသည်။
.
မြန်မာနိုင်ငံတွင် COVID-19 အတည်ပြုလူနာ ၂၂ ဦးအနက် ပိုးတွေ့ရှိပြီးနောက် သေဆုံးသူ ၁ ဦး ရှိကာ ပြည်သူ လူထုအနေဖြင့် ရောဂါကာကွယ်ရေး ဆိုင်ရာ ကျန်းမာရေး ပညာပေး အချက်အလက်များအား တိကျစွာ လိုက်နာ ဆောင်ရွက်ခြင်းဖြင့် မိမိ သာမက မိမိ၏ မိသားစုနှင့် ပတ်ဝန်းကျင်မှ လူများအတွက်ပါ ရောဂါ ကူးစက်မှု မရှိစေရေး ပူးပေါင်း ဆောင်ရွက်ရန် ကျန်းမာရေးနှင့် အားကစားဝန်ကြီးဌာနမှ နှိုးဆော်ထားသည်။
.
ကမ္ဘာ့နိုင်ငံများနှင့်
နယ်မြေဒေသများတွင် COVID-19 အတည်ပြု လူနာပေါင်း ၁၁၇၄၈၆၆ ဦးထိ တွေ့ရှိထားကာ ယင်းအနက်
သေဆုံးသူမှာ ၆၄၅၄၁ ဦး ရှိကြောင်း WHO ၏ ဧပြီလ ၆ ရက်
ထုတ်ပြန်ချက်များအရ သိရသည်။
.
