COVID-19 အတည်ပြုလူနာအသစ် ၃ ဦး တွေ့ရှိ၊ (ယခင်လူနာများအနက် ၃ ဦးတွင် ပိုး မတွေ့တော့ကြောင်း ထုတ်ပြန်)

COVID-19 အတည်ပြုလူနာ အသစ် ၃ ဦး ထပ်မံ တွေ့ရှိကြောင်းနှင့် ယခင် အတည်ပြုလူနာများအနက် ၃ ဦးတွင် ပိုး မတွေ့ရတော့ကြောင်း ကျန်းမာရေးနှင့် အားကစားဝန်ကြီးဌာန၏ ယနေ့ (ဧပြီလ ၁၇ ရက်)၊ ည ၈ နာရီတွင် ထုတ်ပြန်ချက်အရ သိရသည်။

.

အမျိုးသားကျန်းမာရေး ဓာတ်ခွဲမှုဆိုင်ရာဌာန (ရန်ကုန်) သည် ယနေ့တွင် ရောဂါစောင့်ကြည့်လူနာနှင့် အသွားအလာ ကန့်သတ်ခြင်း/ တားမြစ်ခြင်း  ဆောင်ရွက် ထားရှိသူ စုစုပေါင်း ၉၃ ဦး၏ ဓာတ်ခွဲ နမူနာများအား (ပထမအသုတ်) အနေဖြင့် စစ်‌ဆေးခဲ့ရာ ၃ ဦးတွင် COVID-19 ရောဂါပိုး တွေ့ရခြင်း ဖြစ်ကြောင်း သိရသည်။

. 

အဆိုပါ အတည်ပြုလူနာများမှာ အင်းစိန်ဆေးရုံမှ စောင့်ကြည့်လူနာ ၁ ဦး၊ ရန်ကုန်ပြည်သူ့ဆေးရုံမှ စောင့်ကြည့်လူနာ ၁ ဦး၊ ကလေးမြို့တွင် အသွားအလာ ကန့်သတ်ထားသူ ၁ ဦးတို့ ဖြစ်ကာ လူနာများ၏ အချက်အလက်များကိုမူ ထုတ်ပြန်ခြင်း မရှိသေးချေ။

.

ထို့အတူ COVID-19 အတည်ပြုလူနာ အမှတ်(၃) ဖြစ်သည့် အသက် ၂၆ နှစ်အရွယ် အမျိုးသား၊ လူနာအမှတ် (၉) ဖြစ်သည့် အသက် ၄၄ နှစ်အရွယ် အမျိုးသား၊ လူနာအမှတ် (၁၂) ဖြစ်သည့် အသက် ၆၅ နှစ်အရွယ် အမျိုးသားတို့တွင် ရောဂါပိုး မတွေ့တော့ကြောင်းကိုလည်း ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်တွင် ဖော်ပြထားသည်။

.

မြန်မာနိုင်ငံတွင် ယနေ့ (ဧပြီလ ၁၇ ရက်)၊ ည ၈ နာရီထိ COVID-19 အတည်ပြုလူနာ ၈၈ ဦး ရှိပြီ ဖြစ်ကာ၊ ယင်းအနက် ၄ ဦး သေဆုံး၍ ၅ ဦးမှာ ပြန်လည် သက်သာလာပြီ ဖြစ်ကြောင်း သိရသည်။

.

ကမ္ဘာတစ်ဝှမ်းရှိ နိုင်ငံနှင့် ဒေသအသီးသီးတွင် COVID-19 ရောဂါပိုး အတည်ပြုဖြစ်ပွားသူ ၂၀၃၄၈၀၂ ဦး၊ သေဆုံးသူ ၁၃၅၁၆၃ ဦး ရှိကြောင်း ကမ္ဘာ့ကျန်းမာရေးအဖွဲ့အစည်း (WHO)၏ ဧပြီလ ၁၇ ရက်၊ ညနေ ၃ နာရီ ထုတ်ပြန်ချက်အရ သိရသည်။