COVID-19 အတည်ပြုလူနာ ၁ ဦး ထပ်မံတွေ့ရှိပြီး ယနေ့ညတွင် လူနာအသစ် ၁၂ ဦး ရှိ

COVID-19 လူနာ ၁ ဦး ထပ်မံ တွေ့ရှိကြောင်း ကျန်းမာရေးနှင့် အားကစား ဝန်ကြီးဌာနက ယနေ့ (ဧပြီလ ၁၃ ရက်)၊ ည ၁၀ နာရီ ၁၅ မိနစ်တွင် ထုတ်ပြန်ခဲ့ရာ ည ၈ နာရီက ထုတ်ပြန်သော လူနာအသစ် ၁၁ ဦး ရှိခဲ့သဖြင့် ယနေ့ညတွင် အတည်ပြုလူနာ ၁၂ ဦး ရှိကြောင်း သိရသည်။

.

ထပ်မံတွေ့ရှိသည့် လူနာမှာ မကွေးတိုင်းဒေသကြီး၊ မြို့သစ်မြို့နယ်ရှိ သတ်မှတ်ထားသော နေရာတွင် အသွားအလာ ကန့်သတ်၍ စောင့်ကြပ် ကြည့်ရှုခြင်း (Quarantine) ဆောင်ရွက်ထားရှိသူဖြစ်ကာ ည ၈ နာရီက ထုတ်ပြန်ခဲ့သည့် လူနာ ၁၁ ဦးမှာ ရန်ကုန်တိုင်းဒေသကြီးရှိ သတ်မှတ် နေရာများတွင် အသွားအလာ ကန့်သတ်၍ စောင့်ကြပ် ကြည့်ရှုခြင်း ဆောင်ရွက်ထားသူများ ဖြစ်ကြောင်း သိရသည်။

.

မြန်မာနိုင်ငံတွင် ယနေ့ (ဧပြီလ ၁၃ ရက်)၊ ည ၁၀ နာရီ ၁၅ မိနစ်ထိ အတည်ပြုလူနာ ၅၃ ဦး ရှိပြီ ဖြစ်ကာ ယင်းအနက် ပိုးတွေ့သေဆုံးသူ ၄ ဦး၊ ပြန်လည် သက်သာလာသူ ၂ ဦး ရှိကြောင်းနှင့် အတည်ပြုလူနာ စတင် တွေ့ရှိသည့် မတ်လ ၂၃ ရက်မှ ယနေ့ထိ ထုတ်ပြန်ချက်များအနက် အတည်ပြုလူနာ အများဆုံး တွေ့ရှိခြင်း ဖြစ်ကြောင်း ကျန်းမာရေးနှင့် အားကစား ဝန်ကြီးဌာန၏ ထုတ်ပြန်ချက်များအရ သိရသည်။

.

ကမ္ဘာ့နိုင်ငံများနှင့် နယ်မြေဒေသများတွင် COVID-19 အတည်ပြု လူနာပေါင်း ၁၇၇၃၀၈၆ ဦးထိ တွေ့ရှိထားကာ ယင်းအနက် သေဆုံးသူမှာ ၁၁၁၆၅၂ ဦး ရှိကြောင်း WHO ၏ ဧပြီလ ၁၃ ရက်၊ ည ၅ နာရီ ထုတ်ပြန်ချက်များအရ သိရသည်။