COVID-19 အတည်ပြုလူနာ ၁ ဦး ထပ်မံ တွေ့ရှိ၊ လူနာအသစ် ၅ ဦး ဖြစ်

COVID-19 အတည်ပြုလူနာ အသစ် ၁ ဦး ထပ်မံ တွေ့ရှိကြောင်း ကျန်းမာရေးနှင့် အားကစားဝန်ကြီးဌာနက ဧပြီလ ၂၄ ရက် ၊ ည ၁၁ နာရီတွင် ထပ်မံ ထုတ်ပြန်ခဲ့ရာ ယနေ့တွင် လူနာအသစ် ၅ ဦး ရှိပြီ ဖြစ်ကြောင်း သိရသည်။

.

အဆိုပါ အတည်ပြုလူနာ အမှတ် (၁၄၄)မှာ ကချင်ပြည်နယ်၊ မိုးညှင်းမြို့နယ်မှ အသက် ၂၄ နှစ်အရွယ် အမျိုးသား ဖြစ်ကာ ၎င်းလူနာသည် ကချင်ပြည်နယ်၏ ပထမဆုံးသော COVID-19 လူနာ ဖြစ်သည်။

.

အမျိုးသားကျန်းမာရေး ဓာတ်ခွဲမှုဆိုင်ရာဌာန (ရန်ကုန်) (NHL) နှင့် ဆေးသုတေသနဦးစီးဌာန (DMR) တို့မှ ယနေ့ည ၁၁  နာရီအထိ စစ်ဆေးပြီးစီးခဲ့သော ဓာတ်ခွဲနမူနာ ၃၅၀ ခုအနက် ၅ ဦးတွင် COVID-19 ပိုး တွေ့ရခြင်း ဖြစ်ပြီး လူနာများကို သက်ဆိုင်ရာ ဆေးရုံများသို့ လွှဲပြောင်း ကုသပေးမည် ဖြစ်ကြောင်း သိရသည်။
.

မြန်မာနိုင်ငံတွင် မတ်လ ၂၃ ရက်မှ ယနေ့ (ဧပြီလ ၂၄ ရက်) ည ၁၁ နာရီထိ COVID-19 အတည်ပြုလူနာ ၁၄၄ ဦး ရှိပြီ ဖြစ်ကာ၊ ယင်းအနက် ၅ ဦး သေဆုံး၍ ၉ ဦးမှာ ပြန်လည် သက်သာလာပြီ ဖြစ်ကြောင်းနှင့် ရှမ်းပြည်နယ်တွင်မူ COVID-19 အတည်ပြုလူနာ ၇ ဦး ရှိကြောင်း သိရသည်။

.