COVID-19 အတည်ပြုလူနာအသစ် ၅ ဦး ထပ်တွေ့၊ တစ်လအတွင်း ၁၃၂ ဦး ရှိ

COVID-19 အတည်ပြုလူနာ အသစ် ၅ ဦး ထပ်မံ တွေ့ရှိကြောင်း ကျန်းမာရေးနှင့် အားကစားဝန်ကြီးဌာနက ဧပြီလ ၂၃ ရက် ၊ ည ၈ နာရီတွင် ထုတ်ပြန်ခဲ့သဖြင့် မြန်မာနိုင်ငံ၌ မတ်လ ၂၃ ရက်မှ ယနေ့အထိ တစ်လအတွင်း အတည်ပြုလူနာ ၁၃၂ ဦး ရှိပြီ ဖြစ်ကြောင်း သိရသည်။

.

အဆိုပါ အတည်ပြုလူနာများမှာ ရန်ကုန်တိုင်းဒေသကြီးမှ ၄ ဦးနှင့် မန္တလေးတိုင်းဒေသကြီးမှ ၁ ဦးတို့ ဖြစ်ပြီး ရန်ကုန်တိုင်းဒေသကြီးမှ လူနာများသည် အတည်ပြုလူနာများနှင့် ထိတွေ့မှု ရှိခဲ့သော်လည်း မန္တလေးတိုင်းဒေသကြီးမှ လူနာသည် အတည်ပြုလူနာနှင့် ထိတွေ့မှု မရှိသည့်အပြင် ပြည်ပသို့ သွားရောက်သည့် ခရီးသွား ရာဇဝင် မရှိသည့် အသက် ၈၀ အရွယ် အမျိုးသား ဖြစ်ကြောင်း ထုတ်ပြန်ချက်တွင် ဖော်ပြထားသည်။

.

အမျိုးသားကျန်းမာရေး ဓာတ်ခွဲမှုဆိုင်ရာဌာန (ရန်ကုန်)သည် ဧပြီလ ၂၃ ရက်၏ ပထမအသုတ် အဖြစ် စစ်ဆေးခဲ့သော ဓာတ်ခွဲနမူနာ ၈၂ ခုအနက် ၅ ဦးတွင် COVID-19 ပိုး တွေ့ရခြင်း ဖြစ်ပြီး လူနာများကို သက်ဆိုင်ရာ ဆေးရုံများသို့ လွှဲပြောင်း ကုသပေးမည် ဖြစ်ကြောင်း သိရသည်။
.

မြန်မာနိုင်ငံတွင် မတ်လ ၂၃ ရက်မှ ယနေ့ (ဧပြီလ ၂၃ ရက်) ည ၈ နာရီထိ COVID-19 အတည်ပြုလူနာ ၁၃၂ ဦး ရှိပြီ ဖြစ်ကာ၊ ယင်းအနက် ၅ ဦး သေဆုံး၍ ၉ ဦးမှာ ပြန်လည် သက်သာလာပြီ ဖြစ်ကာ ရှမ်းပြည်နယ်တွင်မူ COVID-19 အတည်ပြုလူနာ ၆ ဦး ရှိကြောင်း သိရသည်။