စုလှိုင်
.
ရှမ်းပြည်နယ်တောင်ပိုင်း၊ ကလောမြို့နယ်၊
အောင်ပန်းမြို့ရှိ အားကစားကွင်းတွင် အခြေခံလူတန်းစား ပျံကျ ဈေးသည်များအတွက် ယနေ့ ဧပြီလ
၂၄ ရက်မှ စတင်၍ ယာယီဈေးပြုလုပ်ပေးထားကြောင်း သိရသည်။
.
.
“အခုဖြစ်နေတဲ့ ကူးစက်မြန် ကပ်ရောဂါ ကာကွယ်ထိန်းချုပ်ရေးလည်း
လုပ်ရမယ်။ ဒါပေမဲ့ တစ်ဘက်ကလည်း လူတွေရဲ့ စားဝတ်နေရေးနဲ့ ကုန်စည်စီးဆင်းမှုကိုလည်း အဆင်ပြေချောမွေ့အောင်
လုပ်ရမယ်။ အဲဒီ ၂ ခုလုံးကို မျှခြေဖြစ်အောင် ဆောင်ရွက်ရတာ အရမ်းခက်ပါတယ်။ ဒါက စီမံခန့်ခွဲမှုနဲ့
လူတွေကို စည်းရုံးပြီးတော့ လူထုတွေ အသိပညာ ရရှိအောင် ဆောင်ရွက်တာပါ” ဟု ကလောမြို့နယ်
ပြည်သူ့လွှတ်တော်ကိုယ်စားလှယ် ဒေါ်ပြုံးကေသီနိုင် က ကမ္ဘောဇတိုင်းသို့ ပြောသည်။
အဆိုပါ ယာယီပျံကျဈေးကို နေ့စဉ် နံနက် ၆
နာရီမှ နံနက် ၁၀ နာရီ အထိသာ ရောင်းချခွင့်ပြုထားပြီး သားငါးများ ရောင်းချခွင့်ပြုမည်မဟုတ်ဘဲ
သားငါးရောင်းချသူများကို မြို့မဈေးအတွင်း နေရာချထားပေးသွားမည်ဖြစ်ကြောင်း သိရသည်။
.
အောင်ပန်းမြို့၊ ယာယီ
ပျံကျစျေးဆောင်ရွက်ရာတွင် လွှတ်တော်ကိုယ်စားလှယ်များ၊ ဌာနဆိုင်ရာ တာဝန်ရှိသူများ၊
ပရဟိတအသင်းအဖွဲ့များ၊ အရပ်ဘက်လူမှုအဖွဲ့အစည်းများ၊ မြို့မိမြို့ဖများနှင့် စျေးအကျိုးတော်ဆောင်များ
ပူးပေါင်း ဆောင်ရွက်ခဲ့ကြောင်း သိရသည်။
.
အောင်ပန်းမြို့သည်
ရှမ်းပြည်နယ်တောင်ပိုင်း၊ အရှေ့ပိုင်းဒေသနှင့် မန္တလေးတိုင်းဒေသကြီးတို့ကို
ဆက်သွယ် ထားသည့် မိတ္ထီလာ-သာစည်-ကလော-အောင်ပန်း-တောင်ကြီး-ကျိုင်းတုံ-တာချီလိတ်
ပြည်ထောင်စုလမ်းမကြီးပေါ်တွင် တည်ရှိသည့် ရထားလမ်းဆုံ၊ ကားလမ်းဆုံမြို့ဖြစ်ပြီး
ကုန်သွယ်စီးပွားရေး အချက်အခြာကျသည့် မြို့တစ်မြို့ဖြစ်ပြီး ဖြစ်ကြောင်း သိရသည်။
.
