COVID- 19 ကူးစက်မှု မဖြစ်စေရန်အတွက် ကျိုင်းတုံသို့ မသွားရောက်ကြရန် တားမြစ်ထား

ထက်တိုင်းကျော်

.

ရှမ်းပြည်နယ်အရှေ့ပိုင်း၊ ကျိုင်းတုံခရိုင်အတွင်းရှိ မြို့နယ်များတွင် နေထိုင်သည့် ပြည်သူများအား COVID-19 ကူးစက်ရောဂါ မဖြစ်စေရန်အတွက် ကျိုင်းတုံမြို့သို့ သွားရောက်ခြင်း မပြုကြရန် သက်ဆိုင်ရာမြို့နယ် စီမံခန့်ခွဲမှုကော်မတီများက အသိပေးကြေညာထားကြောင်း သိရသည်။

.

“ အရေးကြီး ကိစ္စနဲ့ ကျန်းမာရေး နာရေးကိစ္စဆိုရင်တော့ မြို့နယ်အုပ်ချုပ်ရေးမှူးရဲ့ ခွင့်ပြုချက်နဲ့ သွားလာခွင့် ပြုပေးထားပါတယ်။ သာမန်အနေနဲ့တော့ COVID-19 ရောဂါ ကူးစက်မှု မဖြစ်အောင်လို့ ထိန်းပေးထားတယ်လို့ သိရပါတယ်”ဟု ကျိုင်းတုံခရိုင်စီမံခန့်ခွဲမှုကော်မတီ ဥက္ကဌ ခရိုင်အုပ်ချုပ်ရေးမှူး ဦးဝင်းမင်းသိန်းက ကမ္ဘောဇတိုင်းသို့ ပြောသည်။

.

မိုင်းဖြတ် ပြည်သူ့ဆေးရုံမှ ကျိုင်းတုံဆေးရုံသို့ လွှဲပြောင်း၍ ဆေးကုသမှု ခံယူနေသည့်  COVID- 19 အတည်ပြု လူနာအမှတ် (၆၄)တွင် COVID-19 ပိုး တွေ့ရှိကြောင်း ကျန်းမာရေးနှင့် အားကစားဝန်ကြီးဌာနက ကြေညာပြီးနောက် ကျိုင်းတုံခရိုင် အတွင်းရှိ မိုင်းပျ ဉ်း၊ မိုင်းခတ်နှင့် မိုင်းယန်းမြို့နယ်များမှ ပြည်သူများအား ကျိုင်းတုံမြို့သို့ သွားရောက်ခြင်း မပြုကြရန် သက်ဆိုင်ရာ မြို့နယ် စီမံခန့်ခွဲမှု ကော်မတီများက တားမြစ်ခဲ့ခြင်း ဖြစ်ကြောင်း သိရသည်။

.

“ ကျွန်မတို့ မြို့ကတော့ တိတ်ဆိတ်နေပါတယ်။ စျေးဆိုင် တော်တော်များများလည်း ပိတ်ထားကြပါတယ်။ အိမ်ထဲကနေ အိမ်ပြင်ကို မထွက်ကြရတော့ ဒီရောဂါ မကြာပါစေနဲ့လို့ ဆုတောင်းပါတယ်” ဟု မိုင်းပျဉ်းမြို့မှ ဒေသခံတစ်ဦးက ပြေသည်။

.

အဆိုပါ COVID- 19 အတည်ပြု လူနာအမှတ် (၆၄)သည် မိုင်းဖြတ်မြို့မှ အသက် ၂၃ နှစ် အရွယ် အမျိုးသား ဖြစ်ပြီး ၎င်းအား ကျိုင်းတုံ ပြည်သူ့ဆေးရုံရှိ ကူးစက်ရောဂါ အထူးကြပ်မတ် ကုသဆောင်တွင် ထားရှိ၍ ဆေးကုမှု ပေးနေကြောင်း သိရသည်။