ရှမ်းပြည်နယ်လွှတ်တော် ဥက္ကဌ၏ ယာဉ်မောင်းနှင့် ရဲတပ်ဖွဲ့မှူး၏ ကိုယ်ရေးအရာရှိတွင် COVID-19 ပိုး မတွေ့

ရှမ်းပြည်နယ်အရှေ့ပိုင်း၊ ကျိုင်းတုံမြို့တွင် Quarantine ဝင်နေသည့် ရှမ်းပြည်နယ်လွှတ်တော် ဥက္ကဌ၏ ယာဉ်မောင်းနှင့် ရှမ်းပြည်နယ် ရဲတပ်ဖွဲ့မှူးတို့၏ ကိုယ်ရေးအရာရှိတို့တွင် COVID-19 ပိုး တွေ့ရခြင်း မရှိကြောင်း ရှမ်းပြည်နယ်အစိုးရ အဖွဲ့ထံမှ သိရသည်။

.

“ မနေ့ညက စစ်တဲ့အထဲမှာ သူတို့ ၂ ယောက်ဟာ ပါလာတယ်။ Negative ထွက်တယ်ပေါ့။ သူတို့ကို နောက်ထပ် ၄၈ နာရီ စောင့်ကြည့်မယ်ပေါ့။ ပြီးရင် Home Quarantine ဆက်ထားပါမယ်။” ဟု ရှမ်းပြည်နယ်အစိုးရအဖွဲ့ ပြည်နယ် လူမှုရေးဝန်ကြီး ဒေါက်တာ မျိုးထွန်းက ကမ္ဘောဇတိုင်းသို့ ပြောသည်။

.

ရှမ်းပြည်နယ် ဝန်ကြီးချုပ် အပါအဝင် ၃၀ ဦးခန့်အား ကျိုင်းတုံမြို့တွင် Test Kits ဖြင့် စစ်ဆေးစဉ် ရှမ်းပြည်နယ်လွှတ်တော် ဥက္ကဌ၏ ယာဉ်မောင်းနှင့် ရှမ်းပြည်နယ် ရဲတပ်ဖွဲ့မှူးတို့၏ ကိုယ်ရေးအရာရှိတို့တွင်  COVID-19 ပိုး တွေ့ရသည်ဟု ပြသနေခြင်းကြောင့် ခရီးစဉ်တွင် လိုက်ပါ တာဝန် ထမ်းဆောင်စေခြင်း မပြုဘဲ ကျိုင်းတုံတွင် Quarantine ပြုလုပ်စေကာ ဓါတ်ခွဲနမူနာများအား ပေးပို့ စစ်ဆေးရာ ဓါတ်ခွဲအဖြေတွင် COVID-19  ပိုး မတွေ့ရခြင်း ဖြစ်ကြောင်း သိရသည်။

.

အဆိုပါ ဝန်ထမ်း ၂ ဦးတွင် ပိုးတွေ့ရခြင်း မရှိသောကြောင့် ရှမ်းပြည်နယ်အစိုးရ ဧည့်ရိပ်သာတွင် Quarantine ဝင်နေသည့် ရှမ်းပြည်နယ်ဝန်ကြီးချုပ်နှင့် ပြည်နယ် အစိုးရအဖွဲ့ဝင်များအနေဖြင့် Quarantine  ဆက်လက် ဝင်ရောက်သင့်/မသင့်အား ဆွေးနွေးနေလျက် ရှိသဖြင့် အခြေအနေကို လတ်တလောတွင် အတည်မပြုနိုင်သေးကြောင်း ရှမ်းပြည်နယ်အစိုးရအဖွဲ့ ပြောရေးဆိုခွင့်ရှိသူ ပြည်နယ် စီမံကိန်းနှင့် ဘဏ္ဍာရေးဝန်ကြီး ဦးစိုးညွန့်လွင်ထံမှ သိရသည်။

.