မိုင်းယန်းတွင် အလှူပွဲမှ ပြန်လာသူအား ကိုယ်အပူချိန် မြင့်တက်နေသဖြင့် စောင့်ကြည့်လူနာအဖြစ် သတ်မှတ်ထား

စိုင်းသိင်္ခသူ

.

ရှမ်းပြည်နယ်အရှေ့ပိုင်း၊ မိုင်းယန်းတွင် ကျေးရွာအလှူပွဲ တစ်ခုသို့ သွားရောက်ပြီးနောက် ဧပြီလ ၁၈ ရက်တွင် ပြန်လည် ရောက်ရှိလာသူများအနက် ကိုယ်အပူချိန် မြင့်တက်နေသူ အမျိုးသမီး တစ်ဦးအား စိစစ်စမ်းသပ် တွေ့ရှိရသဖြင့် စောင့်ကြည့်လူနာအဖြစ် သတ်မှတ်၍ မိုင်းယန်းဆေးရုံ သီးသန့်အဆောင်တွင် ၎င်း၏ မိသားစုဝင် ၂ ဦးနှင့်အတူ  Hospital Quarantine အဖြစ် ထားရှိကာ ၎င်းတို့၏ ဓါတ်ခွဲနမူနာများအား ရန်ကုန်သို့ ပေးပို့ စစ်ဆေးသွားရန် မိုင်းယန်းမြို့နယ် ဆေးရုံအုပ်ကြီးထံမှ သိရသည်။

.

“ သူတို့ရဲ့ နှာခေါင်းနဲ့ အာခေါင်တို့ဖတ် နမူနာတွေကို ၁၉ ရက်နေ့မှာ ပို့ပါမယ်။ အခု မိသားစု အားလုံး ဆေးရုံမှာ ထားရှိပါတယ်။”ဟု မိုင်းယန်းမြို့နယ် ဆေးရုံအုပ်ကြီး ဒေါက်တာ ဖြိုးထွဋ်ကိုကိုထွန်းက ပြောသည်။

.

မိုင်းယန်းမြို့နယ်၊ မိုင်းလွေကျေးရွာနေ မိသားစုဝင် ၃ ဦးသည် တစ်ရွာတည်းနေ အခြားသူ ၁၀ ဦးနှင့်အတူ ဧပြီလ ၄ ရက်တွင် မိုင်းခတ်မြို့နယ်၊ ဝမ်အွန်ကျေးရွာအုပ်စု၊ ဟိုကျင်းကျေးရွာရှိ အလှူပွဲသို့ သွားရောက်ခဲ့ပြီး ဧပြီလ ၁၈ ရက်တွင် ပြန်လည် ရောက်ရှိလာကြောင်း သတင်းအရ မိုင်းလွေကျေးရွာ ကျန်းမာရေးဌာနမှ ကျန်းမာရေးမှူးမှ သွားရောက် စစ်ဆေးရာ အဆိုပါ ၁၃ ဦးအနက် အသက် ၂၂ နှစ်အရွယ် အမျိုးသမီးသည် ကိုယ်အပူချိန် မြင့်တက်နေသည်မှာ ၂ ရက် ရှိနေပြီး လည်ချောင်းနာ ဝေဒနာ ခံစားနေရကြောင်း စမ်းသပ်စိစစ် တွေ့ရှိချက်အရ စောင့်ကြည့်လူနာအဖြစ် သတ်မှတ်၍ မိုင်းယန်းပြည်သူ့ဆေးရုံသို့ ၎င်း၏ ခင်ပွန်းနှင့် သမီးဖြစ်သူတို့ကိုပါ ခေါ်ဆောင်ကာ Hospital Quarantine အဖြစ် စောင့်ကြည့် ကုသပေးနေခြင်း ဖြစ်ကြောင်း သိရသည်။

.

ထို့အပြင် စောင့်ကြည့် သံသယလူနာနှင့်အတူ သွားရောက်ခဲ့သည့် အမျိုးသား ၅ ဦး၊ အမျိုးသမီး ၅ ဦး၊ ပေါင်း ၁၀ ဦးကိုလည်း ဧပြီလ ၁၈ ရက်မှ စတင်၍ မိုင်းလွေ အခြေခံပညာ အလယ်တန်းကျောင်း၌ Facility Quarantine အဖြစ် သီးခြား ထားရှိကြောင်း သိရသည်။

.

မိုင်းယန်းမြို့နယ်တွင် Facility Quarantine ခံယူနေသူ ၃၂ ဦး ရှိနေပြီး ယခု Hospital Quarantine ခံယူရသူ ၃ ဦးမှာ ပထမဆုံး ဓါတ်ခွဲ နမူနာ ရယူရသည့် စောင့်ကြည့်လူနာ(PUI) များ ဖြစ်ကြောင်း သိရသည်။

.