COVID-19 ကာကွယ်ရေးအတွက် ကျန်းမာရေးသုံး ပစ္စည်းများကို ရှမ်းပြည်နယ်အစိုးရအဖွဲ့က ပေးအပ် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Saturday, April 18, 2020

COVID-19 ကာကွယ်ရေးအတွက် ကျန်းမာရေးသုံး ပစ္စည်းများကို ရှမ်းပြည်နယ်အစိုးရအဖွဲ့က ပေးအပ်

ရှမ်းပြည်နယ်ဝန်ကြီးချုပ် ဒေါက်တာ လင်းထွဋ်နှင့် အစိုးရအဖွဲ့ဝင် ဝန်ကြီးများသည် ရှမ်းပြည်နယ် အရှေ့ပိုင်းနှင့် တောင်ပိုင်းရှိ မြို့များ၌ ဧပြီလ ၁၇ ရက်နှင့် ၁၈ ရက်တို့တွင် ရှမ်းပြည်နယ် အစိုးရအဖွဲ့မှ COVID-19 ရောဂါ ကာကွယ်ရေးအတွက် ကျန်းမာရေး အထောက်အကူပြု ပစ္စည်းများကို ထောက်ပံ့ ပေးအပ်ခဲ့ကြောင်း သိရသည်။
.

ရှမ်းပြည်နယ် ဝန်ကြီးချုပ်နှင့် ပြည်နယ်အစိုးရအဖွဲ့ဝင် ဝန်ကြီးများသည် မိုင်းပျဉ်းမြို့ ပြည်သူ့ဆေးရုံနှင့် တုံတာ ဆေးရုံတို့တွင် COVID-19 ရောဂါ ကာကွယ်ရေးအတွက် လိုအပ်သည့် နှာခေါင်းစည်း(Mask) PPE ဝတ်စုံ၊ လက်အိတ်၊ မျက်မှန်၊ အပူချိန်တိုင်း ကိရိယာ၊ လက်သန့်ဆေးရည်၊ လည်ရှည် ဖိနပ်၊ ကျန်းမာရေး ဝန်ထမ်းများအား လိုအပ်သည့် နေရာများတွင်အသုံးပြုနိုင်ရန် ထောက်ပံ့ငွေများကို ဧပြီလ ၁၇ ရက်က ပေးအပ်ခဲ့ကြောင်း သိရသည်။
.

ထို့အတူ ဧပြီလ ၁၈ ရက်တွင် ကျိုင်းတုံ ဆေးရုံတွင် လိုအပ်သည့် Ventilator ၁ လုံးနှင့် COVID-19 ရောဂါ ကာကွယ်ရေးအတွက် လိုအပ်သည့် ပစ္စည်းများကို လည်းကောင်း၊ မိုင်းခတ်ဆေးရုံနှင့် မိုင်းယန်းဆေးရုံတို့အတွက် COVID-19 ရောဂါ ကာကွယ်ရေးအတွက် လိုအပ်သည့် ပစ္စည်းများ၊ ကျန်းမာရေးဝန်ထမ်းများအတွက် ထောက်ပံ့ငွေကို လည်းကောင်း ပေးအပ်ခဲ့ကာ ကမ္ဘောဇဘဏ်မှ ပြည်သူများအတွက် လှူဒါန်းသည့် ဆန်အိတ် ၁၀၀၀ ကို ပြည်နယ်အစိုးရ အဖွဲ့က လက်ခံခဲ့ကြောင်း သိရသည်။
.

ထို့အပြင် ရှမ်းပြည်နယ် စီမံကိန်းနှင့် ဘဏ္ဍာရေးဝန်ကြီး ဦးစိုးညွန့်လွင်နှင့် အစိုးရအဖွဲ့ဝင် ဝန်ကြီးများသည် ရှမ်းပြည်နယ် တောင်ပိုင်းရှိ မောက်မယ်၊ လင်းခေး၊ မိုင်းပန်၊ မိုးနဲမြို့များရှိ ဆေးရုံ၊ Quarantine စင်တာ၊ ဘုန်းတော်ကြီးကျောင်းများတွင် COVID-19 ရောဂါ ကာကွယ်ရေးအတွက် လိုအပ်သည့် ပစ္စည်းများ၊ ထောက်ပံ့ရေး ပစ္စည်းများကို ဧပြီလ ၁၈ ရက်က ပေးအပ်ခဲ့ကြောင်း သိရသည်။
.
အဆိုပါ ပြည်နယ်အစိုးရ အဖွဲ့ဝင်များ၏ လှူဒါန်းမှုများကို ရှမ်းပြည်နယ်အစိုးရအဖွဲ့၊ ကမ္ဘောဇဘဏ်၊ ရှမ်းပြည်နယ် ပြည်သူလူထု စားနပ်ရိက္ခာ ထောက်ပံ့ရေးကော်မတီနှင့် အလှူရှင် အသီးသီးတို့၏ ထည့်ဝင် လှူဒါန်းမှုများဖြင့် ဆောင်ရွက်ခြင်း ဖြစ်ကြောင်း သိရသည်။

No comments:

Post a Comment

Journal Download

Photo of three cats

About