ရှမ်းပြည်နယ် မြောက်ပိုင်း၊
လားရှိုးပြည်သူ့ဆေးရုံတွင် သီးခြား ထားရှိ၍ စောင့်ကြပ် ကုသမှု ပေးနေသည့် COVID-19 အတည်ပြု လူနာအမှတ်(၁၄)၏ ကျန်းမာရေး
အခြေအနေမှာ ယခု (ဧပြီလ ၈ ရက်၊ နေ့လယ် ၁၂ နာရီ)ထိ ကောင်းမွန် နေလျက်ရှိကြောင်း
သိရသည်။
.
“ လူနာက အခြေအနေ
ကောင်းပါတယ်။ သွေးပေါင်ချိန်လည်း ကောင်းတယ်၊ အသက်ရှူနှုန်းလည်း ကောင်းတယ်၊ ဘာမှ မဖြစ်ပါဘူး၊
ပုံမှန်ပါပဲ။” ဟု ရှမ်းပြည်နယ်မြောက်ပိုင်း ပြည်သူ့ကျန်းမာရေးနှင့် ကုသရေးဦးစီးဌာန
ပြည်နယ်ဦးစီးဌာနမှူး ဒေါက်တာ တင်မောင်ညွန့်က ကမ္ဘောဇတိုင်းသို့ ပြောသည်။
.
ယင်း လူနာအမှတ်(၁၄)သည်
ထိုင်းနိုင်ငံမှ ကျောက်မဲမြို့သို့ ပြန်လည်ရောက်ရှိလာသည့် အသက် ၂၄ နှစ်အရွယ်
အမျိုးသား ဖြစ်ပြီး ကျောက်မဲဆေးရုံ၌ စောင့်ကြည့်လူနာအဖြစ် သတ်မှတ်၍
ဓါတ်ခွဲနမူနာအား စစ်ဆေးစဉ် COVID-19 ပိုး တွေ့ရှိခဲ့ပြီးနောက် လားရှိုးဆေးရုံသို့ ပြောင်းရွှေ့ ထားရှိကာ စောင့်ကြပ်
ကုသမှု ပေးနေခြင်း ဖြစ်သည်။
.
COVID-19 အတည်ပြု လူနာအမှတ်(၁၇)ဖြစ်သည့်
ပေါက်ခေါင်းမြို့နယ်မှ အသက် ၄၇ နှစ်အရွယ် ဒုတိယမြို့နယ် အုပ်ချုပ်ရေးမှူးသည် ယနေ့
(ဧပြီလ ၈ ရက်)၊ နံနက် ၃ နာရီ ၄၀ မိနစ်တွင် ပြည်ဆေးရုံတွင် လည်းကောင်း၊ လူနာအမှတ် (၁၆)
ဖြစ်သည့် အသက် ၆၃ နှစ်အရွယ် အမျိုးသမီးသည် ၁၀ နာရီ၊ ၅ မိနစ်တွင် ဝေဘာဂီဆေးရုံတွင် လည်းကောင်း
အသီးသီး သေဆုံးသွားခဲ့သည်ဟု ကျန်းမာရေးနှင့် အားကစား ဝန်ကြီးဌာနမှ ဒေါက်တာ
ခင်ခင်ကြီးက လူမှုကွန်ရက်တွင် ရေးသား၍ အတည်ပြုခဲ့သည်။
.
မြန်မာနိုင်ငံတွင်
COVID-19 အတည်ပြု လူနာ ၂၂ ဦးအနက် သေဆုံးသူ
၃ ဦး ရှိပြီ ဖြစ်ကာ ပြည်သူများ အနေဖြင့်
ရောဂါကာကွယ်ရေး ဆိုင်ရာ ကျန်းမာရေးပညာပေး အချက်အလက်များအား တိကျစွာ လိုက်နာ ဆောင်ရွက်ခြင်းဖြင့်
မိမိသာမက မိမိ၏ မိသားစုနှင့် ပတ်ဝန်းကျင်မှ လူများအတွက်ပါ ရောဂါ ကူးစက်မှု မရှိစေရေး
ပူးပေါင်း ဆောင်ရွက်ပေးရန် ကျန်းမာရေးနှင့်အားကစားဝန်ကြီးဌာနက နှိုးဆော်ထားသည်။
