နမ့်စန်ရှိတည်းခိုခန်းများကို COVID-19 ကာကွယ်ရေးအတွက် ယာယီပိတ် - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Sunday, March 29, 2020

နမ့်စန်ရှိတည်းခိုခန်းများကို COVID-19 ကာကွယ်ရေးအတွက် ယာယီပိတ်


ထက်တိုင်းကျော်
.
ရှမ်းပြည်နယ်တောင်ပိုင်း၊ နမ့်စန်မြို့နယ်ရှိ တည်းခိုခန်းများအား COVID-19 ကူးစက်မှု မရှိစေရေးအတွက် ကြိုတင်ကာကွယ်သည့် အနေဖြင့် မတ်လ ၂၆ ရက်မှ စတင်၍ ယာယီပိတ်ထားလိုက်ပြီ ဖြစ်ကြောင်း သိရသည်။
.
" KTV အပါအဝင် လူစုလူဝေး ဖြစ်နိုင်တဲ့နေရာတွေကို COVID-19 ကူးစက်ရောဂါ ကြိုတင်ကာကွယ်ရေး အတွက် ပိတ်ထားပါတယ်။ တည်းခိုခန်းပဲ ပိတ်တာ ဖြစ်ပါတယ်။ ဟိုတယ်တွေတော့ မပိတ်သေးပါဘူး။"ဟု နမ့်စန်မြို့နယ် အုပ်ချုပ်ရေးမှုး ဦးညီညီအောင်က ကမ္ဘောဇတိုင်းသို့ ပြောသည်
.
ယင်းကဲ့သို့ တည်းခိုခန်းများကို ယာယီ ပိတ်ထားရန်အတွက် နမ့်စန်မြို့နယ် စီမံခန့်ခွဲမှု‌ကော်မတီနှင့် တည်းခိုခန်းလုပ်ငန်းရှင်များ တွေ့ဆုံညှိနှိုင်း၍ သဘောတူညီချက်ဖြင့် ပိတ်ထားခြင်း ဖြစ်ကြောင်း သိရသည်။
.

"တည်းခိုခန်းမှာ မတည်းရတော့ ဟိုတယ်လို နေရာမှာ သွားတည်းမယ်ဆိုတဲ့ စျေးနှုန်းကို သာမာန်လူတွေ မတတ်နိုင်ပါဘူး။ လမ်းဘေးမှာပဲ ဖြစ်သလို အိပ်တာပေါ့ဗျာ"ဟု ခရီးသည်တင် ယာဉ်မောင်း တစ်ဦးက ပြောသည်။
.
နမ့်စန်မြို့သည် ပြည်ထောင်စု လမ်းမပေါ်တွင် တည်ရှိသည့် လမ်းဆုံမြို့ ဖြစ်ခြင်းကြောင့် ခရီးသည်နှင့် ယာဉ်မျိုးစုံတို့ ခေတ္တ ညအိပ် တည်းခိုလေ့ ရှိသည့်နေရာ ဖြစ်သည့် အပြင် ဌာနေ ပြည့်သူ့စစ်အဖွဲ့များ ရုံးစိုက်ရာ ရှမ်းပြည်နယ် တောင်ပိုင်း၏ လောင်းကစား မြို့တော်အဖြစ် ထင်ရှားသည့် မြို့လည်း ဖြစ်သည်။

No comments:

Post a Comment

Journal Download

Photo of three cats

About