မဲခေါင်မြစ်ကိုဖြတ်၍ ဝင်ရောက်လာသည့် မြန်မာနိုင်ငံသားများကို လာအို ပိတ်ပင်

ထက်တိုင်းကျော်

.

ရှမ်းပြည်နယ်အရှေ့ပိုင်း၊ တာချီလိတ်မြို့ရှိ ဝမ်ပုံဆိပ်ကမ်းမှ မဲခေါင်မြစ်အား ဖြတ်သန်း၍ လာအိုနိုင်ငံ၊ မိုင်းမောဆိပ်ကမ်း သို့ ဝင်ရောက်လာသည့် မြန်မာနိုင်ငံသားများကို မတ်လ ၂၃ ရက်မှ စတင်၍ လာအိုနိုင်ငံဘက်က ပိတ်ပင်ထားကြောင်း သိရသည်။

.

.

မြန်မာနိုင်ငံ လူဝင်မှုကြီးကြပ်ရေးဦးစီးဌာနမှူး ဦးသန်းဦး ဦးဆောင်သည့် အဖွဲ့နှင့် လာအိုနိုင်ငံမှ ဗိုလ်မှူး Mr.Onchan Xayya Xayya ဦးဆောင်သည့် အဖွဲ့တို့သည် မတ်လ ၂၃ ရက်က မြန်မာနိုင်ငံ၊ ဝမ်ပုံဆိပ်ကမ်းရှိ လူဝင်မှုကြီးကြပ်ရေး ဦးစီးဌာနရုံးတွင် တွေ့ဆုံပြီးနောက် ထိုကဲ့သို့ ပိတ်ပင်လိုက်ခြင်းဖြစ်ကြောင်း သိရသည်။

.

“လာအိုနိုင်ငံဘက်က COVID-19 ကူးစက်ရောဂါ ထိန်းချုပ်မှု အနေနဲ့ ဧပြီလ ၂၁ ရက်အထိ ပိတ်ထားမယ်လို့ သိရ ပါတယ်။ လာအိုနိုင်ငံဘက်မှာ ရောက်နေတဲ့ မြန်မာနိုင်ငံသားတွေကိုတော့ ပြန်ထွက်ခွင့် ပြုပေးထားပါတယ်” ဟု ကျိုင်းတုံမြို့ရှိ တွဲဘက်ပြည်နယ်လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာနမှ လက်ထောက်ညွှန်ကြားရေးမှူး ဦးလှအေးက ကမ္ဘောဇတိုင်းသို့ ပြောသည်။

.

ယင်းကဲ့သို့ လာအိုနိုင်ငံဘက်မှ ပိတ်ပင်မှုနှင့် ပတ်သက်၍ ဝမ်ပုံဆိပ်ကမ်းအနီးတွင် နေထိုင်သူ ဒေသခံတစ်ဦးက “မဲခေါင်မြစ်ကို နေ့စဉ် ဖြတ်ကူးသွားလာ လုပ်ကိုင်စားသောက်နေသူတွေအတွက်တော့ အခက်အခဲ ဖြစ်သွားပါမယ်။ ပြီးတော့ မဲခေါင်မြစ် ကူးတို့ဆိပ်က စက်လှေသမားတွေတော့ ဝင်ငွေမရှိ ဖြစ်သွားမယ်” ဟု ၎င်း၏အမြင်ကို ပြောဆို ခဲ့သည်။

.

တာချီလိတ်မြို့တွင် ထိုင်းနိုင်ငံ၊ မယ်ဆိုင်မြို့နှင့် ဆက်သွယ်ထားသည့် အမှတ် (၁) နှင့် အမှတ် (၂) ချစ်ကြည်ရေး တံတားမှ မြန်မာနိုင်ငံသားများ ဝင်ရောက်ခြင်းကို မတ်လ ၂၃ ရက်မှ စတင်၍ ထိုင်းနိုင်ငံဘက်မှ စတင်ပိတ်ထားသလို လာအိုနိုင်ငံမှလည်း မဲခေါင်မြစ်မှ ဖြတ်သန်းဝင်ရောက်လာမည့် မြန်မာနိုင်ငံသားများကို ဝင်ရောက်ခွင့် ပိတ်ပင်လိုက် ခြင်းဖြစ်ကြောင်း သိရသည်။

.

မြန်မာနှင့် လာအိုနိုင်ငံတို့သည် ယနေ့ မတ်လ ၂၃ ရက်၊ နေ့လယ်ပိုင်းအထိ အာဆီယံဒေသတွင်း ၁၀ နိုင်ငံတွင် COVID-19 ကူးစက်ရောဂါ အတည်ပြုလူနာ တွေ့ရှိခြင်းမရှိသေးသည့် နိုင်ငံများဖြစ်သည်။

.