အိန္ဒိယနိုင်ငံမှ မြန်မာဘုရာဖူး ၂၅၀၀ ကျော်အား စင်းလုံးငှားလေယာဉ်ဖြင့် ပြန်လည်ခေါ်ယူနေ

စိုင်းသိင်္ခသူ

.

အိန္ဒိယနိုင်ငံအတွင်း ရောက်ရှိနေသည့် မြန်မာနိုင်ငံမှ ဗုဒ္ဓဂါယာဘုရားဖူး ၂၅၀၀ ကျော်အား စင်းလုံးငှားလေယာဉ်များဖြင့် ပြန်လည်ခေါ်ယူလျက်ရှိကြောင်း ဗုဒ္ဓဂါယာ ဘုရားဖူးလုပ်ငန်းကော်မတီမှ သိရသည်။

.

.

ဗုဒ္ဓဂါယာဘုရားဖူးလုပ်ငန်းကော်မတီဥက္ကဋ္ဌသည် ရန်ကုန်မြို့ရှိ အိန္ဒိယနိုင်ငံသံရုံးမှ ကောင်စစ်ဝန် Mr. Pradeep Kumar Patel အား မတ်လ ၁၂ ရက်က သွားရောက်တွေ့ဆုံပြီးနောက် မတ်လ ၁၃ ရက်တွင် ခရီးသွားလုပ်ငန်းကုမ္ပဏီများနှင့် ညှိနှိုင်းကာ ဘုရားဖူးများအား စင်းလုံးငှားလေယာဉ်များဖြင့် ပြန်လည်ခေါ်ယူရန် ဆုံးဖြတ်ခဲ့ခြင်းဖစ်ကြောင်း သိရသည်။

.

အိန္ဒိယနိုင်ငံတွင် ဘုရားဖူးလှည့်လည်နေသည့် မြန်မာနိုင်ငံသားများအား ပြန်လည်ခေါ်ယူနိုင်ရန် ဗုဒ္ဓဂါယာ လေယာဉ် စင်းလုံးငှားခရီးစဉ်လက်မှတ် ရောင်းချပေးနေသာ လုပ်ငန်းကော်မတီအဖွဲ့ဝင် ခရီးသွား ကုမ္ပဏီ ၃ ခုနှင့် ဘုရားဖူး လုပ်ငန်းကော်မတီတို့ ညှိနှိုင်းတိုင်ပင်ဆောင်ရွက်ခဲ့ခြင်းဖြစ်သည်ဟု သိရသည်။

.

“နီပေါလ်နိုင်ငံမှာလည်း တစ်ယောက်မှ မကျန်ပါဘူး။ ရန်ကုန်က အိန္ဒိယကောင်စစ်ဝန်နဲ့ ဆွေးနွေးပြီးနောက် အချိန်မီ ပြန်လည်ခေါ်ဆောင်နိုင်ခဲ့ပါတယ်။ အခု ၂၅၀၀ ကျော်ပါတယ်။ တခြား Air India နဲ့ Indigo လေကြောင်းလက်မှတ်တွေ နဲ့ ပြန်လာနေတဲ့သူတွေလည်လး် သီးခြားရှိပါတယ်” ဟု ဗုဒ္ဓဂါယာဘုရားဖူးလုပ်ငန်းကော်မတီ ဥက္ကဋ္ဌ ဦးမောင်မောင်မြင့် က ကမ္ဘောဇတိုင်းသို့ ပြောသည်။

.

Myanmar Getaway Travels &Tours ကုမ္ပဏီ ၏ အစီအစဉ်ဖြင့် မြန်မာဘုရားဖူး ၁၁၅၂ ဦးကို မတ်လ ၁၂ ရက်မှ ၁၅ ရက်အထိ MAI လေယာဉ် ခရီးစဉ် ၅ ကြိမ်ဖြင့်လည်းကောင်း၊ Thit Shwe Sin Group of companies အစီအစဉ်ဖြင့် မြန်မာဘုရားဖူး ခရီးသည် ၈၁၀ ဦး တို့အား MNA လေကြောင်းခရီးစဉ် မတ်လ ၁၂ရက်မှ ၁၇ ရက်အထိ လည်းကောင်း၊ Indigo လေကြောင်းလိုင်းဖြင့် မတ်လ ၁၇၊ ၁၈ရက်များတွင် စုစုပေါင်း ၆ ကြိမ် ပျံသန်း၍လည်းကောင်း၊ Gracious Vacation ကုမ္ပဏီမှမှ မြန်မာဘုရားဖူး ခရီးသည် ၅၉၆ ဦးကို MNA၊ INDIGO၊ Air India လေကြောင်းများဖြင့် မတ်လ ၁၁ ရက်မှ ၁၈ ရက်အထိ စုစုပေါင်း ၇ ကြိမ် ပျံသန်းကာ ရန်ကုန်မြို့သို့ ပြန်လည်ခေါ်ဆောင်လျက်ရှိရာ စုစုပေါင်း မြန်မာ ဘုရားဖူးခရီးသည် ၂၅၄၈  ဦး အား ပြန်လည်ခေါ်ဆောင်နိုင်ခဲ့ပြီးဖြစ်ကြောင်း သိရသည်။

.

အိန္ဒိယနိုင်ငံမှ မတ်လ ၁၁ ရက်က သာမန်နိုင်ငံကူးလက်မှတ်ကိုင်ဆောင်သူများကို ပြည်တွင်းဝင်ခွင့် မပေးတော့ဟု ကြေညာပြီးနောက် မြန်မာနိုင်ငံမှ ဗုဒ္ဓဂယာဘုရားဖူးများကို ဗုဒ္ဓ္ဂဂယာဘုရားဖူးလုပ်ငန်းကော်မတီမှ ပြန်လည်ခေါ်ယူခဲ့ ခြင်းဖြစ်ကြောင်း သိရသည်။

.