အစိုးရ ဓမ္မာစရိယနှင့် ပါဠိပထမပြန်စာမေးပွဲများအား ရက်ရွှေ့ဆိုင်း

ထက်တိုင်းကျော်

.

လက်ရှိ ကမ္ဘာ့နိုင်ငံများတွင် ဖြစ်ပွားနေသည့် COVID-19 အား ထိန်းချုပ်နိုင်ရန်အတွက် မတ်လ ၂၃ ရက်တွင် စတင်ဖြေဆိုနေသည့် အစိုးရဓမ္မာစရိယစာမေးပွဲနှင့် မတ်လ ၃၀ ရက်၌ ဖြေဆိုမည့် ပါဠိပထမပြန် စာမေးပွဲများကို ရက် အကန့်အသတ်မရှိ ရွှေ့ဆိုင်းထားလိုက်ကြောင်း သိရသည်။

.

ရန်ကုန်မြို့တွင် မတ်လ ၂၄ ရက်က ပြုလုပ်သည့် နိုင်ငံတော်သံဃမဟာနာယကအဖွဲ့၊ တာဝန်ကျ (တတိယအဖွဲ့ခွဲ)၏ ပထမအကြိမ် ဒုတိယ အထူးအစည်းအဝေးမှ နိုင်ငံတစ်ဝန်းတွင် ကျင်းပသည့် စာမေးပွဲများကို COVID-19 ကူးစက်ရောဂါ ကြိုတင်ကာကွယ်ရေးအတွက် ရက်ရွှေ့ဆိုင်ရန် ဆုံးဖြတ်ခဲ့ခြင်း ဖြစ်ကြောင်း သိရသည်။

.

"ကျိုင်းတုံမှာ ပြုလုပ်နေတဲ့ အစိုးရဓမ္မာစရိစာမေးပွဲကို ပိတ်လိုက်ပြီဖြစ်ပါတယ်။ တာချီလိတ်နဲ့ ကျိုင်းတုံမှာ စာဖြေဌာန ၂ ခုနဲ့ လုပ်ဖို့ စီစဉ်ထားတဲ့ ပါဠိပထမပြန်စာမေးပွဲလည်း ရက် ရွှေ့တဲ့ထဲ ပါသွားပါတယ်။"ဟု ကျိုင်းတုံမြို့ရှိ တွဲဘက် ပြည်နယ်သာသနာရေးဦးစီးဌာနရုံးမှ လက်ထောက်ညွှန်ကြားရေးမှူး ဦးချစ်သိန်းက ကမ္ဘောဇတိုင်းသို့ ပြောသည်။

.

နိုင်ငံတော်တော် သံဃမဟာနာယကအဖွဲ့၏ ထုတ်ပြန် ကြေညာချက်တွင် ယဉ်ကျေးလိမ္မာသင်တန်း၊ ဓမ္မစကူးလ်သင်တန်းနှင့် စာမေးပွဲများ စသည့် လူစုလူဝေးဖြင့် ပြုလုပ်သည့် ဘာသာရေး ဆိုင်ရာပွဲများ အခမ်းအနားများကိုလည်း ဆောင်ရွက်ခြင်း မပြုလုပ်ရန် ဖော်ပြထားသည်။

.

ရှမ်းပြည်နယ်နှင့် မြန်မာနိုင်ငံ ဒေသအချို့တွင် အလှူခံမဏ္ဍပ်များ ထားရှိ၍ အလှူခံနေခြင်းမှာ အနယ်နယ် အရပ်ရပ်က ရောက်ရှိလာနိုင်သည့် ရောဂါပိုးကို လက်ခံနေသကဲ့သို့ ဖြစ်ခြင်းကြောင့် အရေးပေါ် ရပ်နားထားသင့်သည်ဟု ဝေဖန်မှုများလည်း ရှိနေသည်။