ကျိုင်းတုံ ရဲစခန်းမှ အချုပ်သား ၁ ဦးကို COVID-19 နှင့် ပတ်သက်၍ ဆေးရုံတွင် စောင့်ကြပ် ကုသပေးနေ - Kanbawza Tai News

Breaking

ကမ္ဘောဇတိုင်းသတင်းဂျာနယ်သည် တောင်ကြီးမြို့တွင် အခြေစိုက်၍ ထုတ်ဝေခွင့်အမှတ် (မြဲ-၀၁၀၇၉)ဖြင့် ဆောင်ရွက်နေသည့် တရားဝင် သတင်းမီဒီယာ တစ်ခု ဖြစ်ပါသည်။

Tuesday, March 31, 2020

ကျိုင်းတုံ ရဲစခန်းမှ အချုပ်သား ၁ ဦးကို COVID-19 နှင့် ပတ်သက်၍ ဆေးရုံတွင် စောင့်ကြပ် ကုသပေးနေ


ထက်တိုင်းကျော်
.
ရှမ်းပြည်နယ် အရှေ့ပိုင်း၊ ကျိုင်းတုံမြို့မရဲစခန်းတွင် အမှုဖြင့် ဖမ်းဆီးထိန်းသိမ်းထားသည့် အချုပ်သား တစ်ဦးကို COVID-19 စောင့်ကြည့်လူနာ အဖြစ် သတ်မှတ်၍ မတ်လ ၃၀ ရက်တွင် ကျိုင်းတုံပြည်သူ့ ဆေးရုံ၌ သီးခြား ထားရှိ၍ စောင့်ကြပ် ကုသမှု ပေးနေလျက် ရှိကြောင်း သိရသည်။
.
အဆိုပါ စောင့်ကြည့်လူနာ အဖြစ် သတ်မှတ်ထားသည့် အချုပ်သားနှင့် ထိတွေ့မှု ရှိခဲ့သော အခြား အချုပ်သား ၂ ဦးကို အသွားအလာ ကန့်သတ်၍ ကျိုင်းတုံပြည်သူ့ဆေးရုံတွင် သီးခြားထားရှိကြောင်းလည်း သိရသည်။
.
“ ဆေးရုံကို ရောက်လာတဲ့ အချုပ်သား ၃ ယောက်ထဲက စောင့်ကြည့်လူနာ ၁ ယောက်ရဲ့ ဓါတ်ခွဲ နမူနာကို ဒီနေ့(မတ်လ ၃၁ ရက်)မှာ အမျိုးသားဓါတ်ခွဲဌာနကို ပေးပို့ထားပါတယ်။ ကျန်တဲ့ ၂ ယောက်ကတော့ Quarantine ထားပါတယ်။"ဟု ကျိုင်းတုံပြည်သူ့ဆေးရုံမှ ဆေးရုံအုပ်ကြီး ဒေါက်တာ လှဌေးမင်းက ကမ္ဘောဇတိုင်းသို့ ပြောသည်
.

ထို့အတူ ကျိုင်းတုံ မြို့မရဲစခန်းမှ ရဲတပ်ဖွဲ့ဝင် တစ်ဦးကလည်း “အချုပ်သားတွေ ကျန်းမာရေး မကောင်းလို့ ဆေးရုံ ပို့ထားတာ ဟုတ်ပါတယ်။” ဟု ပြောသည်။
.
ရဲစခန်းတွင် ဖမ်းဆီး ထိန်းသိမ်းထားသည့် အချုပ်သား အမျိုးသား ၁ ဦးမှာ ထိုင်းနိုင်ငံ မယ်ဆိုင်မြို့မှ ပြန်ရောက်လာပြီးနောက် မူးယစ်ဆေးဝါး အမှုဖြင့် ဖမ်းဆီးခြင်းခံရသူ ဖြစ်ပြီး ၎င်းနှင့် ပတ်သက် ထိတွေ့ခဲ့သူ အချုပ်သား ၂ ဦးတို့ကိုပါ ကျိုင်းတုံ ဆေးရုံသို့ ပို့ဆောင်၍ ဆေးကုသမှု ခံယူစေခြင်း ဖြစ်ကြောင်း သိရသည်။
.
ကျိုင်းတုံမြို့သည် ရှမ်းပြည်နယ်အရှေ့ပိုင်း၏ မြို့‌တော် ဖြစ်ပြီး တရုတ်၊ လာအို၊ ထိုင်းနိုင်ငံတို့နှင့် နယ်နိမိတ်ချင်း တိုက်ရိုက် ထိစပ်မှု မရှိသော်လည်း ယင်းနိုင်ငံများသို့ သွားရောက်၍ အလုပ် လုပ်ကိုင်သူများ အသွား/အလာ ရှိသော မြို့ ဖြစ်သည်။
.

No comments:

Post a Comment

Journal Download

Photo of three cats