ဝိသမလောဘဖြင့် ဈေးကစားသည့် ကုန်သည်လုပ်ငန်းရှင်များကို ထိထိရောက်ရောက် အရေးယူမည်ဟု အစိုးရ သတိပေး

မင်းဇော်မင်း

.

ကုန်သည်လုပ်ငန်းရှင်များအနေဖြင့် ကိုယ်ကျိုးစီးပွားအတွက် ဝိသမလောဘဖြင့် ဈေးကစားပါက ထိထိ ရောက်ရောက် အရေးယူဆောင်ရွက်သွားမည်ဖြစ်သည်ဟု နိုင်ငံတော်သမ္မတရုံး ပြောရေးဆိုခွင့်ရှိသူ ဦးဇော်ဌေး က သတိပေးပြောဆိုခဲ့သည်။

.

 

.

နိုင်ငံတော်သမ္မတရုံးတွင် မတ်လ ၁၃ ရက်က ပြုလုပ်သည့် သတင်းစာရှင်းလင်းပွဲ၌ ဦးဇော်ဌေးက ယင်းကဲ့သို့ ပြောဆိုခဲ့ခြင်းဖြစ်သည်။

.

“ကုန်သည်၊ လုပ်ငန်းရှင်တွေကို သတိပေးပြောကြားလိုပါတယ်။ ဒီအချိန်အခါမှာ အခွင့်ကောင်းယူပြီးတော့ ဈေးကစားတဲ့၊ အကျိုးအမြတ်ရှာတဲ့ လုပ်ငန်းရှင်တွေ၊ ရောင်းချတဲ့သူတွေကို ကျွန်တော်တို့ ထိထိရောက်ရောက် အ‌ရေး ယူမှာဖြစ်ပါတယ်” ဟု ဦးဇော်ဌေးက ပြောသည်။

.

နိုင်ငံတော်အစိုးရအနေဖြင့် ပြည်သူလူထုနှင့် ပတ်သက်၍ ကျရာကဏ္ဍမှ ပူးပေါင်းပါဝင်ဆောင်ရွက်နေခြင်း ဖြစ်ကြောင်း၊ ရောဂါ၏ ကျယ်ပြန့်မှုပမာဏမှာ တစ်ကမ္ဘာလုံးအတိုင်းအတာနှင့် အတော်ကြီးမားသည့်အတွက် ယခု အချိန်တွင် အကျိုးအမြတ်နှင့် ကိုယ်ကျိုးစီးပွားအတွက် ဝိသမလောဘစိတ် မမွေးမြူကြရန် မေတ္တာရပ်ခံလိုကြောင်း ၎င်းက ပြောဆိုခဲ့သည်။

.

“မနေ့ (မတ်လ ၁၂ ရက်) ညက ရန်ကုန်မှာ စားသောက်စရာတွေဝယ်ယူစုဆောင်းကြတာတွေပေါ့။ အခု ကြုံ တွေ့နေရတာက COVID-19 ကူးစက်ရောဂါထက် ဒီရောဂါရဲ့ ဂယက်ပါ။ ဒီဂယက်အပေါ်မှာ အသုံးချပြီး တချို့လည်း ရည်ရွယ်ချက်ရှိရှိ ဖြစ်ကောင်းဖြစ်မယ်၊ တချို့လည်း ရည်ရွယ်ချက်မရှိဘဲ ဖြစ်ကောင်းဖြစ်မယ်။ ဒီလို ကောလာဟလ သတင်းတွေ ထုတ်လွှင့်ခြင်းသည် လူထုအပေါ်မှာ စိုးရိမ်ပူပန်မှုတွေ ကြီးမားစေပါတယ်” ဟု ဦးဇော်ဌေးက ဆက်လက် ပြောဆိုခဲ့သည်။

.

မြန်မာနိုင်ငံအနေဖြင့် အရန်ဆန်တန်ချိန် ၁၅၀၀၀ ရှိထားပြီးဖြစ်ကာ တွက်ချက်၍ လိုအပ်ပါက ထပ်မံစုဆောင်း သွားမည်ဖြစ်ကြောင်းနှင့် နိုင်ငံခြားတင်ပို့မှုကိုလည်း လိုအပ်ပါက ပိတ်ပင်သွားမည်ဖြစ်ကြောင်း၊ ယင်းကိစ္စအတွက် စီး ပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ မြန်မာနိုင်ငံ ဆန်စပါးလုပ်ငန်းရှင်များအသင်း၊ ဆန်စက်လုပ်ငန်းရှင်များအသင်းတို့ကို အစည်းအဝေးခေါ်ယူမည်ဖြစ်ကြောင်း ဦးဇော် ဌေးက ပြောသည်။

 .

COVID-19 နှင့် ပတ်သက်၍ ပြည်သူလူထုအနေဖြင့် အစိုးရိမ်မလွန်ကြရန်လိုကြောင်း၊ မစိုးရိမ်ဘဲလည်း မနေ ကြစေလိုကြောင်း ၎င်းက ပြောသည်။

.

အလားတူ နိုင်ငံတော်သမ္မတရုံးမှလည်း ယင်းနေ့တွင်ပင်  အသက်ရှူလမ်းကြောင်းဆိုင်ရာရောဂါ COVID-19 ကူးစက်ပြန့်နှံ့မှု မရှိစေရေးအတွက် ပြည်သူလူထုအနေဖြင့် လူစုလူဝေးဖြင့် ကျင်းပသော အခမ်းအနားများ၊ မြန်မာ့ရိုးရာ သင်္ကြန်ပွဲ အပါအဝင်ပွဲတော်များကို မတ်လ ၁၃ ရက်မှ ဧပြီလ ၃၀ ရက်အတွင်း မပြုလုပ်ကြရန် ပြည်သူများသို့ ပန်ကြား ထားကြောင်း သိရသည်။

.