မော်တော်ယာဉ်လိုင်းများအား ခရီးသည် တစ်ဝက် လျော့ချရန် ရှမ်းပြည်နယ်အစိုးရ ညွှန်ကြား

စုလှိုင်

.

ရှမ်းပြည်နယ် အတွင်း ပြေးဆွဲနေသော မော်တော်ယာဉ်လိုင်းများအား COVID -19 ထိန်းချုပ် ကာကွယ်သော အနေဖြင့် မတ်လ ၂၈ ရက်မှ စတင်၍ ခရီးသည်များ တစ်ဝက် လျော့ချရန် ရှမ်းပြည်နယ် အစိုးရမှ ညွန်ကြားထားကြောင်း သိရသည်။

.

" Bus ကားတွေနဲ့ လိုင်းကားတွေ အားလုံးပေါ်မှာ တစ်ဝက်လောက်ပဲ တင်ဖို့၊ ၃ ပေခြားစီ ၂ ပေ ခြားစီ ခြားပြီး နေရာ ကျဲကျဲနဲ့ တင်ဖို့ ညွန်ကြားထားပါတယ်။” ဟု ရှမ်းပြည်နယ် အစိုးရ ပြောရေးဆိုခွင့်ရှိသူ ပြည်နယ် စီမံကိန်းနှင့် ဘဏ္ဍာရေး ဝန်ကြီး ဦးစိုးညွန့်လွင်မှ ကမ္ဘောဇတိုင်းသို့ ပြောသည်။

.

ထို့အပြင် ရှမ်းပြည်နယ်အစိုးရအနေဖြင့် ရှမ်းပြည်နယ်အတွင်း၌ ကုန်စျေးနှုန်းများ မြင့်တက်မှု မရှိစေရေးအတွက် ဆောင်ရွက်ထားပြီး ဖြစ်ကာ စားနပ် ရိက္ခာများကိုလည်း အရေးပေါ် ဖြန့်ဝေ ပေးနိုင်ရေးအတွက် စီစဉ် ထားရှိပြီး ဖြစ်ကြောင်းကိုလည်း ဝန်ကြီး ဦးစိုးညွန့်လွင်မှ ဆက်လက် ပြောကြားသည်။

.

COVID 19 နှင့် ပတ်သက်၍ မြို့နယ်အလိုက် ရပ်ကွက်အုပ်ချုပ်ရေးမှူးများ ဦးဆောင်သော အဖွဲ့များမှ ကျန်းမာရေးနှင့် ပတ်သက်သည့် ဆောင်ရန်၊ ရှောင်ရန် အချက်များအား အသံချဲ့စက်ဖြင့် လိုက်လံ ဆော်သြမှုများ ပြုလုပ်ရန် ရှမ်းပြည်နယ်အစိုးရအဖွဲ့မှ ညွှန်ကြားထားကြောင်း သိရသည်။

.

ရှမ်းပြည်နယ် အတွင်းရှိ ဆေးရုံ ၁၆ ခုတွင် COVID-19 နှင့် ပတ်သက်၍ စောင့်ကြည့်လူနာ ၅၉ ဦး၊ သံသယလူနာ ၁ ဦး၊ စုစုပေါင်း လူနာ ၆၀ ဦး ရှိပြီး ယင်းတို့အား ဓါတ်ခွဲ စမ်းသပ်ချက်အရ လူနာ ၅၂ ဦးတွင် ပိုး တွေ့ရှိခြင်း မရှိဘဲ ဓါတ်ခွဲ အဖြေစောင့်ဆိုင်းဆဲလူနာ ၈ ဦး ရှိကာ ပိုးတွေ့လူနာ မရှိသေးကြောင်း ကျန်းမာရေးနှင့် အားကစား ဝန်ကြီးဌာနက ယနေ့ (မတ်လ ၂၈ ရက်)၊ နံနက်ပိုင်း၌ ထုတ်ပြန်ထားသော အချက်အလက်များအရ သိရသည်။