တာချီလိတ်မြို့နယ်ရှိ ကျေးရွာ အချို့တွင် ဝင်/ထွက်ခွင့် တားမြစ်ထား

မင်းဇော်မင်း

.

ရှမ်းပြည်နယ် အရှေ့ပိုင်း၊ တာချီလိတ်မြို့နယ်အတွင်းရှိ ကျေးရွာ အချို့ကို COVID-19 ကြိုတင် ကာကွယ်ရန်အတွက် ရည်ရွယ်ကာ လူထု အစီအစဉ်ဖြင့် ဝင်/ထွက် သွားလာမှု မပြုစေရန် တားမြစ် ပိတ်ပင်ထားကြောင်း သိရသည်။

.

“ ကျိုင်းလပ်ဘက်နဲ့ နားဟိုင်းလုံဘက်က ရွာတွေမှာ စည်းစနစ် ရှိဖို့ ပြင်ပလူ ကန့်သတ်တဲ့ အနေနဲ့ ​Lock Down လုပ်ပါတယ်။ ၁၆ ရွာပါ၊ အခြေအနေ ကောင်းတဲ့အထိပါ” ဟု တာချီလိတ်မြို့နယ်၊ မိုင်းလင်း အနောက်ကျေးရွာအုပ်စု အုပ်ချုပ်ရေးမှူး ဦးစိုင်းရီတစ်က ပြောသည်။

.

မိုင်းလင်းအနောက် ကျေးရွာအုပ်စုတွင် ကျေးရွာ ၂၄ ရွာ ပါဝင်သည့်အနက် ကျေးရွာ ၁၆ ရွာကို မတ်လ ၃၀ ရက်မှ စတင်၍ ဝင်/ထွက် သွားလာမှု မပြုစေရန် တားမြစ် ပိတ်ပင်ထားခြင်း ဖြစ်ပြီး တာလေ ကျိုင်းလပ်ဘက်သို့ သွားရောက်နိုင်သည့် လမ်းပေါ်ရှိ ကျေးရွာ ၈ ရွာ၊ တာ​လေ နားဟိုင်းလုံရွှေတွင်းဘက်သို့ သွားရောက်နိုင်သည့် ရွာ ၆ ရွာနှင့် မယ်ခေါင်မြစ်ဘက်မှ လာရောက်နိုင်သည့် ကျေးရွာ ၂ ရွာတို့ ဖြစ်ကြောင်း သိရသည်။

.

ထို့အတူ မိုင်းလင်းအရှေ့ကျေးရွာ အုပ်စု၌ ပါဝင်သည့် ကျေးရွာ ၁၄ ရွာအနက် ၈ ရွာကိုလည်း ဝင်/ထွက် သွားလာမှု မပြုစေရန် တားမြစ် ပိတ်ပင်ထားကြောင်း သိရသည်။

.

“ လာအို တံတားဘက်နဲ့ တရုတ်ဘက်က လာနိုင်တဲ့ လမ်းက ရွာတွေ ပိတ်ဖို့ စီစဉ်နေကြပါတယ်၊ ဒီဘက်က ဝေးတဲ့ရွာတွေကိုတော့ မပိတ်သေးပါဘူး” ဟု ဝမ်လုံကျေးရွာမှ ဒေါ်နန်းကျန်ဟွမ်က ပြောသည်။

.

လာအိုနှင့် ထိုင်းနိုင်ငံဘက်မှ ဝင်ရောက် လာရောက်နိုင်သည့် မိုင်းဖုန်း(က)(ခ)အုပ်စုများကိုလည်း မတ်လ ၃၀ ရက်တွင်ပင် ဝင်/ထွက် သွားလာမှု မပြုစေရန် တားမြစ် ပိတ်ပင်ထားကြောင်း သိရသည်။

.

အဆိုပါ ဝင်/ထွက် သွားလာမှု မပြုစေရန် တားမြစ် ပိတ်ပင်ခြင်းများမှာ သက်ဆိုင်ရာ အုပ်ချုပ်ရေးမှူးများက ဦးဆောင်၍ လူထု အစီအစဉ်ဖြင့် ဆောင်ရွက်ခြင်း ဖြစ်ပြီး အစိုးရ အနေဖြင့် မြို့အလိုက် Lock Down ပြုလုပ်ခြင်းကို ပြည်သူများ၏ စားဝတ်နေရေး အရ ဆောင်ရွက်ရန် လတ်တလောတွင် အစီအစဉ် မရှိသေးကြောင်း ရှမ်းပြည်နယ်အစိုးရ အဖွဲ့ထံမှ သိရသည်။