ခိုထောင်ကျွန်း လူသတ်မှုနှင့် ပတ်သက်၍ မြန်မာ ၂ ဦး သေဒဏ်မှ လွတ်မြောက်ရေးအတွက် ၈၈၈၈ ဆရာတော်က ဆုတောင်း မေတ္တာပို့ - Kanbawza Tai News

Kanbawza Tai News

Represent For Shan State, Myanmar

Breaking

Boxed(True/False)

Treasure Palace Hotel

Photo of three cats

Friday, September 6, 2019

ခိုထောင်ကျွန်း လူသတ်မှုနှင့် ပတ်သက်၍ မြန်မာ ၂ ဦး သေဒဏ်မှ လွတ်မြောက်ရေးအတွက် ၈၈၈၈ ဆရာတော်က ဆုတောင်း မေတ္တာပို့

ထိုင်းနိုင်ငံ တောင်ပိုင်း၊ ခိုထောင်ကျွန်း (လိပ်ကျွန်း) တွင် ဗြိတိန်နိုင်ငံသား ၂ ဦး သေဆုံးမှုနှင့် ပတ်သက်၍ မြန်မာနိုင်ငံသား ဝင်းဇော်ထွန်းနှင့် ဇော်လင်းတို့ကို ထိုင်းတရားရုံးက လူသတ်မှုဖြင့် သေဒဏ်ပေးခဲ့မှုနှင့် ပတ်သက်၍ ယင်းမြန်မာနိုင်ငံသား ၂ ဦး လွတ်ငြိမ်းချမ်းသာခွင့် ရရှိစေရန် တောင်ကြီးမြို့ ၈၈၈၈ ဆရာတော်နှင့် ရဟန်းရှင်လူ ပြည်သူများက ဆုတောင်းမေတ္တာ ပို့သမှုများ ပြုလုပ်လျက်ရှိကြောင်း သိရသည်။
.
“ ထိုင်းဘုရင်မင်းမြတ် သက်ရှည် ကျန်းမာပါစေ ” ၊ “ထိုင်း-မြန်မာ နှစ်နိုင်ငံ ယုံကြည် ကိုးကွယ်သော ထေရဝါဒဗုဒ္ဓသာသနာ ကမ္ဘာတည်သရွေ့ တည်စေသော် ”၊ “ထိုင်း-မြန်မာ နှစ်နိုင်ငံ ယဉ်ကျေးမှု အဓွန့် ရှည်စေသော် ”၊ “ထိုင်း-မြန်မာ နှစ်နိုင်ငံ ပြည်သူများ ထာဝရ ချစ်ကြည် လက်တွဲမြဲစေသော်” စသည်ဖြင့် ၈၈၈၈ ဆရာတော်နှင့် ရဟန်းရှင်လူ ပြည်သူများက ယနေ့ (စက်တင်ဘာလ ၆ ရက်)တွင် တောင်ကြီးမြို့၌ ဆုတောင်း မေတ္တာ ပို့သခြင်းများ ပြုလုပ်ခဲ့ခြင်း ဖြစ်သည်။
 .

“ ထိုင်း ဘုရင်မင်းမြတ်နဲ့ အတူ ထိုင်းနိုင်ငံ သံဃရာဇာ ဆရာတော်ကြီးများ၊ ထိုင်းအစိုးရ၊ ထိုင်းနိုင်ငံသား အားလုံး ကိုယ်စိတ်နှစ်ဖြာ ကျန်းမာချမ်းသာပါစေလို့ ဆုတောင်းမေတ္တာ ပို့သပါတယ်။ ထိုင်းနိုင်ငံနဲ့ မြန်မာနိုင်ငံဟာ အိမ်နီးချင်းနိုင်ငံတွေ ဖြစ်သလို နှစ်နိုင်ငံ ယဉ်ကျေးမှုနဲ့ ကိုးကွယ်ယုံကြည်ကြတဲ့ ထေရဝါဒ ဗုဒ္ဓဘာသာနိုင်ငံတွေ ဖြစ်ပါတယ်။ ခိုထောင်ကျွန်း လူသတ်မှုနဲ့ ပတ်သက်ပြီး သေဒဏ်အမိန့် ချမှတ်ခံရတဲ့ မြန်မာနိုင်ငံသား ၂ ဦး လွတ်မြောက်ဖို့ အတွက် ထိုင်းဘုရင်မင်းမြတ်ထံ အသနားခံ မိန့်ကြားလိုပါတယ်။” ဟု တောင်ကြီးမြို့၊ အောင်မြေဘုံစံ သာမဏေကျော်ကျောင်းတိုက်မှ ၈၈၈၈ ဆရာတော် ဘဒ္ဒန္တ ခေမာနန္ဒက ကမ္ဘောဇတိုင်းသို့ မိန့်ကြားသည်။
.
ထို့အပြင် မြန်မာနိုင်ငံသား ဝင်းဇော်ထွန်းနှင့် ဇော်လင်းတို့ ၂ ဦး အသက်နှင့် ဘဝ ချမ်းသာရရှိနိုင်ရေး အတွက် မြန်မာနိုင်ငံအစိုးရ၊ မြန်မာ့တပ်မတော်တို့က ကြိုးစားဆောင်ရွက်နေသည့်အတွက် အထူး ဝမ်းသာကျေနပ်မိကြောင်းနှင့် ထိုင်းဘုရင်မင်းမြတ်သည် ထေရဝါဒ ဗုဒ္ဓဘာသာကို ယုံကြည် ကိုးကွယ်သည့် ဘုရင်တစ်ပါး ဖြစ်သည့်အတွက် မြန်မာနိုင်ငံတွင် အမြင့်ဆုံးဖြစ်သော နိုင်ငံတော်သံဃမဟာနာယကအဖွဲ့ ဆရာတော်ကြီးများမှ ထိုင်းနိုင်ငံ သံဃရာဇာ ဆရာတော်ကြီးများနှင့် ထိုင်းဘုရင်မင်းမြတ်အား လျှောက်ထား မေတ္တာရပ်ခံ၍ မြန်မာလူငယ် ၂ ဦး၏ အသက်နှင့် ဘဝကို အလှူခံပါက လွတ်ငြိမ်း ချမ်းသာခွင့် ဧကန်မုချ ပေးသနားမည်ဟု ယုံကြည်ကြောင်းကိုလည်း ဆရာတော်က ဆက်လက် မိန့်ကြားသည်။
.
အဆိုပါ သေဒဏ်ကျခံ မြန်မာနိုင်ငံသား ၂ ဦးအား ထိုင်းနိုင်ငံဆိုင်ရာ မြန်မာသံရုံးမှ တာဝန်ရှိသူများက သြဂုတ်လ ၂၉ ရက်တွင် လည်းကောင်း၊ တပ်မတော်(ကြည်း/ရေ/လေ) ညှိနှိုင်း ကွပ်ကဲရေးမှူး ဗိုလ်ချုပ်ကြီး မြထွန်းဦးမှ စက်တင်ဘာလ ၃ ရက်တွင်လည်းကောင်း သွားရောက် တွေ့ဆုံ၍ အားပေးမှုများ ပြုလုပ်ခဲ့ပြီး ၎င်းတို့ ၂ ဦး ပြစ်ဒဏ် သက်သာခွင့် ရရှိရေးအတွက် မြန်မာအစိုးရ အနေဖြင့် ထိုင်းဘုရင်ထံ အယူခံ ဝင်နိုင်ရေး ဆောင်ရွက်နေကာ တပ်မတော် ကာကွယ်ရေးဦးစီးချုပ်မှလည်း ထိုင်းဝန်ကြီးချုပ်နှင့် တွေ့ဆုံစဉ် အမှုနှင့် ပတ်သက်၍ ကူညီဆောင်ရွက်ပေးရန်အတွက် ပန်ကြားထားကြောင်း သိရသည်။
.
ထိုင်းနိုင်ငံ တောင်ပိုင်း၊ ဆူရတ်ဌာနီခရိုင်၊ ခိုတောင်ကျွန်း (လိပ်ကျွန်း) တွင် ၂၀၁၄ ခုနှစ် နှစ်ကုန်ပိုင်းက ဗြိတိန်နိုင်ငံသား ခရီးသွား ၂ ဦး အသတ်ခံရမှုနှင့် ပတ်သက်၍ မြန်မာရွှေ့ပြောင်းလုပ်သား ၂ ဦး ဖြစ်သည့် ဝင်းဇော်ထွန်းနှင့် ဇော်လင်းတို့ ၂ ဦးအား ကော့စမွီခရိုင် တရားရုံးက ၂၀၁၅ ခုနှစ်၊ ဒီဇင်ဘာလ ၂၅ ရက်တွင် သေဒဏ်ချမှတ်ခဲ့ခြင်း ဖြစ်ပြီး ထိုင်းရှေ့နေများနှင့် ပူးပေါင်းကာ ထိုင်းအယူခံ တရားရုံးတွင် ၂ ကြိမ်တိုင်တိုင် အယူခံ ဝင်ခဲ့ပြီးနောက် အယူခံလွှာကို ဩဂုတ်လ ၂၉ ရက်က နွန်ထဘူရီခရိုင် တရားရုံးမှ ပယ်ချကာ သေဒဏ်အတည်ပြုခဲ့ခြင်း ဖြစ်သည်။

No comments:

Post a Comment

Journal Download

Photo of three cats