ရှမ်းပြည်နယ်နှင့် ကချင်ပြည်နယ်တို့တွင် စစ်ရေးလှုပ်ရှားမှုများ ရပ်ဆိုင်းမည် ဖြစ်ကြောင်း တပ်မတော်မှ ထုတ်ပြန် - Kanbawza Tai News

Kanbawza Tai News

Represent For Shan State, Myanmar

Breaking

Recent Tube

Friday, December 21, 2018

ရှမ်းပြည်နယ်နှင့် ကချင်ပြည်နယ်တို့တွင် စစ်ရေးလှုပ်ရှားမှုများ ရပ်ဆိုင်းမည် ဖြစ်ကြောင်း တပ်မတော်မှ ထုတ်ပြန်

ရှမ်းပြည်နယ်အခြေစိုက် အရှေ့ပိုင်းတိုင်းစစ်ဌာနချုပ်၊ အရှေ့မြောက်တိုင်းစစ်ဌာနချုပ်၊ တြိဂံဒေသတိုင်းစစ်ဌာနချုပ်၊ အရှေ့အလယ်ပိုင်းတိုင်း စစ်ဌာနချုပ်နှင့် ကချင်ပြည်နယ် အခြေစိုက် မြောက်ပိုင်းတိုင်း စစ်ဌာနချုပ် နယ်မြေများရှိ စစ်ဆင်ရေး နယ်မြေများအလိုက် စစ်ရေးဆိုင်ရာ လှုပ်ရှားမှုများ အားလုံးကို  ရပ်ဆိုင်းသွားမည် ဖြစ်ကြောင်း တပ်မတော်ကာကွယ်ရေးဦးစီးချုပ်ရုံးမှ ယနေ့ ဒီဇင်ဘာလ ၂၁ ရက်တွင် ထုတ်ပြန်ခဲ့သည်။


ယင်းကြေညာချက်ကို ပစ်ခတ်တိုက်ခိုက်မှု ရပ်စဲရေးနှင့် ထာဝရငြိမ်းချမ်းရေးအတွက် ထုတ်ပြန်ချက်ဟု ဖော်ပြထားပြီး ရှမ်းပြည်နယ်နှင့် ကချင်ပြည်နယ်ရှိ NCA လက်မှတ်ရေးထိုးရန် ကျန်ရှိနေသေးသော တိုင်းရင်းသား လက်နက်ကိုင်အဖွဲ့အစည်းများ အားလုံးနှင့် ပစ်ခတ်တိုက်ခိုက်မှု ရပ်စဲရေးအတွက် အဖွဲ့ တစ်ဖွဲ့ချင်းအလိုက် ညှိနှိုင်းဆွေးနွေးရန်အတွက် ၂၀၁၈ ခုနှစ်၊ ဒီဇင်ဘာလ ၂၁ ရက်မှ ၂၀၁၉ ခုနှစ်၊ ဧပြီလ ၃၀ ရက်ထိ စစ်ရေးဆိုင်ရာ လှုပ်ရှားမှုများကို ရပ်ဆိုင်း၍ ငြိမ်းချမ်းရေးဆိုင်ရာ ကိစ္စရပ်များကို ဒုတိယဗိုလ်ချုပ်ကြီး ရာပြည့် ဦးဆောင်သော ညှိနှိုင်းဆွေးနွေးရေးအဖွဲ့မှ ဆွေးနွေးသွားမည်ဖြစ်ကြောင်း ဖော်ပြထားသည်။
.
ထို့အပြင် တိုင်းရင်းသား လက်နက်ကိုင်အဖွဲ့များအနေဖြင့် တပ်မတော် ကာကွယ်ရေးဦးစီးချုပ်၏ ငြိမ်းချမ်းမူဝါဒ ၆ ရပ်အနက်မှ သဘောတူ စာချုပ်များအတိုင်း ကတိတည်ရန်၊ ငြိမ်းချမ်းရေး သဘောတူညီချက်များအပေါ် အမြတ်မထုတ်ရန်၊ ဒေသခံပြည်သူများအပေါ် ၀န်ထုပ်ဝန်ပိုး မဖြစ်စေရန်၊ နိုင်ငံတော်က ထုတ်ပြန်ထားသည့် တည်ဆဲဥပဒေများကို လိုက်နာရန် အပါအ၀င် တိုင်းရင်းသား လက်နက်ကိုင်အဖွဲ့ အချင်းချင်း တစ်ဖွဲ့နှင့် တစ်ဖွဲ့ အပြန်အလှန် အင်အားသုံး၍ တိုက်ခိုက်ခြင်း၊ ဒေသခံတိုင်းရင်းသားများအပေါ် အနိုင်ကျင့်ခြင်းများကို မပြုလုပ်ရေးနှင့် နိုင်ငံတော် အစိုးရ၏ အုပ်ချုပ်ရေး ယန္တရား အဆင့်ဆင့်ကို လည်းကောင်း၊ လမ်းပန်းဆက်သွယ်မှု လုံခြုံချောမွေ့စေရေးကို လည်းကောင်း၊ ပြည်သူလူထု၏ အသက်အိုးအိမ် စည်းစိမ်နှင့် အကျိုးစီးပွားများကို လည်းကောင်း ထိခိုက်မှု မဖြစ်စေရန်အတွက် တာဝန်ယူရမည် ဖြစ်ကြောင်းနှင့် ယင်းဖြစ်ရပ်များ ဖြစ်ပေါ်လာပါက တပ်မတော်မှ လိုအပ်သလို တားဆီး ဆောင်ရွက်မည်ဟု ကြေညာချက်၌ ဖော်ပြထားသည်။
.

တပ်မတော်အနေဖြင့် ပစ်ခတ်တိုက်ခိုက်မှု ဖြစ်ပွားခဲ့သော နယ်မြေများအတွင်းရှိ တိုက်ပွဲရှောင် ပြည်သူများ မူလနေရပ်သို့ အမြန်ဆုံး ပြန်လည် ရွှေ့ပြောင်း နေရာချပေးနိုင်ရေး ဆောင်ရွက်ချက်ကို ပူးပေါင်း ကူညီဆောင်ရွက်သွားမည် ဖြစ်ကြောင်းနှင့် တိုင်းရင်းသား နယ်မြေများ၏ လူမှု စီးပွားဘ၀ ဖွံ့ဖြိုးတိုးတက်ရေးဆိုင်ရာ အကောင်အထည်ဖော်မှုတွင် ပါဝင်ကူညီဆောင်ရွက်ပေးသွားမည် ဖြစ်ကြောင်းလည်း သိရသည်။
.
NCA လက်မှတ်ရေးထိုးခြင်း ၃ နှစ်မြောက် နှစ်ပတ်လည်နေ့ သီးသန့်တွေ့ဆုံပွဲတွင် တပ်မတော် ကာကွယ်ရေးဦးစီးချုပ်မှ ပြောဆိုခဲ့သော ၂၀၂၀ ပြည့်နှစ်တွင် ငြိမ်းချမ်းရေးလုပ်ငန်းစဉ်များ ပြီးမြောက်စေရေး သန္နိဌာန် ချထားကြောင်းနှင့် တပ်မတော်အနေဖြင့် သန္နိဌာန်အတိုင်း ဖြစ်မြောက်အောင် ဆောင်ရွက်ပြီး တိုင်းရင်းသား ပြည်သူလူထု လိုလားတောင့်တနေသည့် ထာဝရ ငြိမ်းချမ်းရေးကို ပြည်သူလက်သို့ အရောက် အပ်နှင်းမည်ဟူသည့် သန္နိဌာန်ကို တိုင်းရင်းသား လက်နက်ကိုင် အဖွဲ့အစည်း အားလုံးကလည်း ကတိက၀တ် ပြုပြီးနောက် လုံခြုံရေးဆိုင်ရာ ပြန်လည် ပေါင်းစည်းရေးနှင့် ပြည်ထောင်စု သဘောတူစာချုပ် ချုပ်ဆိုနိုင်ရေး  သတ်မှတ်လုပ်ငန်းစဉ်များအတိုင်း ပြီးမြောက် အောင်မြင်သည်ထိ ဆက်လက် အကောင်အထည်ဖော် ဆောင်ရွက်ရန် တိုက်တွန်းထားကြောင်း သိရသည်။


Recent Tube