လားရှိုးမြို့တွင် ကျင်းပမည့် တန်ဆောင်တိုင် မီးပုံးပျံပွဲတော်သို့ လာရောက်မည့် ယာဉ်များအားလုံး မြို့ရှောင်လမ်းမှ လာရောက်ကြရန် မေတ္တာရပ်ခံ

နောင် (မြစ်မခ)/ကမ္ဘောဇတိုင်း

.

ရှမ်းပြည်နယ်မြောက်ပိုင်း၊ လားရှိုးမြို့တွင် တတိယအကြိမ်မြောက် ကျင်းပမည့် တန်ဆောင်တိုင် မီးပုံးပျံပွဲတွင် ယာဉ်ကြောပိတ်ဆို့မှုနှင့် ယာဉ်အန္တရာယ် ကင်းရှင်းစေရန်အတွက် လားရှိုးမြို့သို့ လာရောက်မည့် ယာဉ်ကြီး၊ ယာဉ်ငယ်များ အားလုံး မြို့ရှောင်လမ်းမှ လာကြရန် လားရှိုးမြို့ အမှတ် (၂၀) ယာဉ်ထိန်းရဲ ဒုတပ်ဖွဲ့ခွဲမှူးရုံးမှ မေတ္တာရပ်ခံ ထုတ်ပြန်လိုက်ကြောင်း သိရှိရသည်။   

.

 

.

အဆိုပါ မီးပုံးပျံပွဲကို လားရှိုးမြို့ နမ္မတူသွားကားလမ်းဘေးတွင်ရှိသော တိုင်းရင်းသား ယဉ်ကျေးမှုကွင်းတွင် ကျင်းပရန် ယခင်က စီစဉ်ခဲ့ရာမှ အကြောင်း အမျိုးမျိုးကြောင့် လားရှိုးမြို့၊  ရပ်ကွက် (၁) နားမခေါ်ကားကွင်းအနီးရှိ ချယ်ရီမြိုင်အိမ်ရာ ဝန်းသို့ ပြောင်းလဲကျင်းပခြင်းဖြစ်ကြောင်း သိရသည်။  

.

“ယာဉ်ကြောပိတ်ဆို့မှု မရှိစေရေး၊ ယာဉ်အန္တရာယ်ကင်းရှင်းစေရေးအတွက် လုပ်ဆောင်တာဖြစ်ပါတယ်။ မြို့ရှောင် လမ်းကနေ သွားပေးရုံပါပဲ’’ဟု လားရှိုးမြို့အမှတ် (၂၀) ယာဉ်ထိန်းရဲတပ်ဖွဲ့ခွဲမှူးရုံးမှ ဒုရဲမှူး ကျော်ခိုင်က ပြောသည်။ 

.

အဆိုပါ မြို့ရှောင်လမ်းမှ သွားလာခြင်းအား မီးပုံးပျံပွဲတော်ရက် နိုဝင်ဘာ ၂၀ ရက်မှ ၂၂ ရက်အတွင်းသာ သွားလာရန် ဖြစ်ပြီး မီးပုံပျံပွဲသို့ လာရောက်သော ယာဉ်များမှလည်း မိမိယာဉ်ကြောမှသာ စည်းကမ်းရှိရှိဖြင့်  မောင်းနှင်ကြရန် မေတ္တာရပ်ခံ ထုတ်ပြန်ပေးထားခြင်းဖြစ်ကြောင်း သိရသည်။ 

.

“ဒီလိုလမ်းကြောင်းပေးထားတော့ အဆင်ပြေပါတယ်။ အရင် ပထမဆုံးနှစ်မှာ ယာဉ်ကြောပိတ်ဆို့မှုဖြစ်တယ်။ အချိန်တွေအရမ်းကြာသွားရတယ်။ စည်းကမ်းမဲ့တာတွေကြောင့်လည်း ဖြစ်သွားတာပါ။  အတင်းကျော်တက် ကြလို့ရယ် ယာဉ်ကြော ပြောင်းပြန်မောင်းတာတွေကြောင့် ဖြစ်ရတာပါ။’’ဟု လားရှိုးမြို့ ဒေသခံ ကိုသူရိန်ဝင်းက ပြောသည်။

.

အဆိုပါ မီးပုံးပျံပွဲမှာ လားရှိုးမြို့တွင် ကျင်းပခြင်းမှာ တတိယအကြိမ်ဖြစ်ကြောင်းနှင့် လားရှိုးမြို့ ချယ်ရီမြိုင် အိမ်ရာဝန်းအတွင်း ကျင်းပခြင်းမှာ ဒုတိယအကြိမ်ဖြစ်ပြီး မီးပုံးပျံကြီး ၁၅ လုံးနှင့် အရန်မီးပုံးပျံသေး ၁၃၀၀ ခန့် လွှတ်တင်မည်ဖြစ်ကြောင်း သိရသည်။

.

အဆိုပါ မီးပုံးပျံပွဲသို့ အနယ်နယ်အရပ်ရပ်မှ ပြည်သူများ လာရောက်ကြခြင်းကြောင့် ယာဉ်ကြောပိတ်ဆို့မှု ဖြစ်ပွားမည်ကို စိုးရိမ်ရကြောင်း လားရှိုးမြို့ ဒေသခံများထံမှ သိရသည်။

.

.

.

#KBZTai #Shan