ဂုတ်တွင်းလမ်းတွင် နွားတင် ၁၂ ဘီးယာဉ် တစ်စီးတိမ်းမှောက် ယာဉ်မောင်း သေဆုံးကာ၊ ၂ ဦး ဒဏ်ရာရ

နောင် (မြစ်မခ)/ကမ္ဘောဇတိုင်း

.

ရှမ်းပြည်နယ်မြောက်ပိုင်း၊ နောင်ချိုမြို့နှင့် ကျောက်မဲမြို့ကြား ဂုတ်တွင်းလမ်းတွင် နိုဝင်ဘာ ၈ ရက်၊ နံနက်ပိုင်းက နွားတင် ၁၂ ဘီးယာဉ်တစ်စီးတိမ်းမှောက်ပြီးယာဉ်မောင်းသေဆုံးကာ နှစ်ဦးဒဏ်ရာရရှိခဲ့ကြောင်း နောင်ချိုမြို့ ယာဉ်ထိန်းရဲ တပ်ဖွဲ့စိတ်မှ သိရှိရသည်။

.

 

.

ဂုတ်တွင်းလမ်းပိုင်း၊ နောင်ချိုဘက်ခြမ်း နတ်စင်ရေကန်ကွေ့ မိုင်တိုင်အမှတ် ၈/၆-၇ ကြားတွင် နွားများတင် ဆောင်လာသော ၁၂ ဘီး ယာဉ်တစ်စီးတိမ်းမှောက်သွားရာ ယာဉ်မောင်းသေဆုံးသွားပြီး ဒဏ်ရာများရရှိခဲ့သည့် ယာဉ်နောက်လိုက် ၂ ဦးကို ဆေးရုံသို့ပို့ဆောင်ပေးခဲ့ကြောင်း သိရသည်။

.

“ယာဉ်မောင်းသေဆုံးတယ်။ နွားထိန်း ၂ ဦး ဒဏ်ရာရတယ်။ အမှုဖွင့်ဖို့ဆောင်ရွက်ထားပါတယ်။’’ဟု နောင်ချိုမြို့ ယာဉ်ထိန်းရုံးတပ်ဖွဲ့စိတ်မှ ရဲအုပ် ခင်မောင်မြင့်ကပြောသည်။

.

တိမ်းမှောက်ယာဉ်ခေါင်းခန်းတွင်ညပ်မိကာသေဆုံးသွားသော ယာဉ်မောင်း၏ ရုပ်အလောင်းအား နောင်ချိုမီး သတ်တပ်ဖွဲ့ဝင်များမှ ကူညီဆွဲထုတ်ပေးခဲ့ရကြောင်း ကျောက်မဲ အဖြူရောင်နှလုံးသား ပရဟိတအသင်းမှ သိရသည်။

.

“ကျွန်တော်တို့က မန္တလေးကိုလူနာသွားအပို့ လမ်းကြုံတွေ့လို့ကူညီခဲ့တာပါ။ ဒဏ်ရာရတဲ့ ၂ ဦးကို နောင်ချိုဆေး ရုံကို ပို့ပေးခဲ့တာပါ။ ယာဉ်မောင်းကတော့ ကားခေါင်းခန်းမှာညပ်နေတယ်။ ပတ်ဝန်းကျင်က ပြောတာတော့  ဘရိတ်ပေါက်ပြီး မှောက်တာလို့ ပြောကြတယ်။’’ဟု ကျောက်မဲ အဖြူရောင်နှလုံးသား ပရဟိတအသင်းမှ ဦးမြဝင်းက ပြောသည်။

.

အခင်းဖြစ်ရာသို့ နောင်ချိုမြို့မှ လူမှုရေးအသင်းကားများလည်း လာရောက်ကူညီပေးကြပြီး အဆိုပါ နောင်ချို-ကျောက်မဲမြို့ကြားလမ်းပိုင်းတွင် နွားတင်ယာဉ်များ မကြာခဏ သေနတ်ဖြင့် ပစ်ခံရခြင်း၊ တိမ်းမှောက်ခြင်းများ ဖြစ်ပေါ်နေကြောင်း သိရသည်။ 

.

.

.

#KBZTai #Shan