နောင်ချိုတွင် ဖန်တီးအိမ်အဖွဲ့မှ ဦးဆောင်၍ နိုင်ငံရေးတွင် အမျိုးသမီးများ ပါဝင်နိုင်ရေး ဆွေးနွေး - Kanbawza Tai News

Kanbawza Tai News

Represent For Shan State, Myanmar

Breaking

Thursday, October 18, 2018

နောင်ချိုတွင် ဖန်တီးအိမ်အဖွဲ့မှ ဦးဆောင်၍ နိုင်ငံရေးတွင် အမျိုးသမီးများ ပါဝင်နိုင်ရေး ဆွေးနွေး



မေသူဇော်၊ ကမ္ဘောဇတိုင်း
.
ရှမ်းပြည်နယ်မြောက်ပိုင်း၊ နောင်ချိုမြို့တွင် ဖန်တီးအိမ်အဖွဲ့မှ ဦးဆောင်၍ နိုင်ငံရေးပါတီများမှ အမျိုးသမီး များ၊ ၁၀ အိမ်စုမှူး အမျိုးသမီးများနှင့် ဖန်တီးအိမ်အဖွဲ့မှ စွမ်းဆောင်ရည်မြင့် သင်တန်းသူများ တွေ့ဆုံကာ နိုင်ငံရေး တွင် အမျိုးသမီးများ ပါဝင်လာနိုင်ရေးအတွက် ဆွေးနွေးခဲ့ကြောင်း သိရသည်။
.
.
“အောက်တိုဘာလ ၁၂ ရက်က နောင်ချိုမြို့မှာရှိတဲ့ မဏိရတနာခန်းမမှာ တွေ့ဆုံဆွေးနွေးခဲ့တာပါ။ နောင်ချို မြို့ပေါ်မှာရှိတဲ့ နိုင်ရေးပါတီက အမျိုးသမီး ၁၀ ဦး၊ နောင်ချိုမြို့ပေါ်မှာရှိတဲ့ ၁၀ အိမ်စုမှူး အမျိုးသမီး ၁၀ ဦးနဲ့ ဖန်တီးအိမ်က စွမ်းရည်မြင့်သင်တန်း ပို့ချထားတဲ့ အမျိုးသမီး ၁၈ ဦး၊ စုစုပေါင်း ၃၈ ဦး တက်ရောက် ဆွေးနွေး ခဲ့ကြတာပါ။ အဓိက ရည်ရွယ်ချက်ကတော့ နိုင်ငံရေးကို စိတ်ဝင်စားတဲ့ အမျိုးသမီးတွေကို စွမ်းဆောင်ရည် မြင့်မား လာစေဖို့၊ နိုင်ငံရေး စိတ်ဝင်စားတဲ့ အမျိုးသမီးတွေအချင်းချင်း ကွန်ရက်ချိတ်ဆက်မိစေဖို့နဲ့ နိုင်ငံရေးဖြစ်စဉ်တွေမှာ အမျိုးသမီးတွေ ပါဝင်မှု အားကောင်းလာစေဖို့ ရည်ရွယ်ထားတာဖြစ်ပါတယ်” ဟု ဖန်တီးအိမ်အဖွဲ့အစည်းမှ စီမံကိန်းအရာရှိ ဒေါ်ဝါ၀ါအောင်က ပြောသည်။
.
အဆိုပါတွေ့ဆုံပွဲတွင် နောင်ချိုမြို့ပေါ်ရှိ နိုင်ငံရေးပါတီများဖြစ်သော နိုင်ငံရေးပါတီများနှင့် အင်းစိမ်းမေ အမျိုးသမီးအဖွဲ့မှ နိုင်ငံရေးစိတ်ဝင်စားသည့် အမျိုးသမီးများ တက်ရောက်ခဲ့ပြီး နိုင်ငံရေးဖြစ်စဉ်များတွင် အမျိုးသမီး ပါဝင်မှု အားကောင်းလာစေရေး၊ ဆုံးဖြတ်ချက် ချမှတ်နိုင်သည့် နေရာများတွင် အမျိုးသမီးများ ပါဝင်လာစေရေး၊ အမျိုးသမီး အုပ်ချုပ်ရေးမှူးများ ပေါ်ထွက်လာစေရေးတို့ကို ဆွေးနွေးခဲ့ကြကြောင်း သိရသည်။
.
ဖန်တီးအိမ်အဖွဲ့အစည်းသည် ရန်ကုန်မြို့တွင်အခြေစိုက်သော အဖွဲ့အစည်းတစ်ခုဖြစ်ပြီး ၂၀၀၉ ခုနှစ်မှ စတင်၍ အသင်းအဖွဲ့မှတ်ပုံတင်ရရှိထားသည့် အစိုးရမဟုတ်သော ပြည်တွင်းအဖွဲ့အစည်းတစ်ခုဖြစ်သည်။ အဖွဲ့ အနေဖြင့် နိုင်ငံရေးတွင် အမျိုးသမီးများ ပါဝင်မှု အားကောင်းလာစေရေးအတွက် လုပ်ဆောင်နေသည့် အဖွဲ့တစ်ခု ဖြစ်ပြီး လက်ရှိတွင် နိုင်ငံရေးပါတီ ၁၇ ခုနှင့် ဒေသတွင်းရှိ ဒေသန္တရအုပ်ချုပ်ရေးအဖွဲ့အစည်းများ၊ ဒေသတွင်းရှိ  အမျိုးသမီးခေါင်းဆောင်များနှင့် လက်တွဲလုပ်ကိုင်နေသည့် အဖွဲ့အစည်းတစ်ခုဖြစ်ကြောင်း သိရသည်။
.
အဆိုပါ အဖွဲ့သည် ရှမ်းပြည်နယ်မြောက်ပိုင်းတွင် စီမံကိန်းဝင်မြို့နယ်များဖြစ်သော လားရှိုး၊ သီပေါ၊ နောင်ချို နှင့် သိန်းနီမြို့နယ်များတွင် လုပ်ငန်းများ ဆောင်ရွက်လျက်ရှိကြောင်း သိရသည်။
.
.
.
#KBZTai #Shan