ရှမ်းပြည်နယ်တွင် တစ်လလျှင် ပျမ်းမျှ ရက် ၂၀ ခန့် သဘာဝဘေးအန္တရာယ်ဒဏ် ခံစားနေရ - Kanbawza Tai News

Kanbawza Tai News

Represent For Shan State, Myanmar

Breaking

Friday, February 1, 2019

ရှမ်းပြည်နယ်တွင် တစ်လလျှင် ပျမ်းမျှ ရက် ၂၀ ခန့် သဘာဝဘေးအန္တရာယ်ဒဏ် ခံစားနေရ


ရဲရင့်ဇွဲ
.
ရှမ်းပြည်နယ်အတွင်း၌ ၂၀၁၈ ခုနှစ်၊ ဧပြီလ ၁ ရက်မှ ၂၀၁၉ ခုနှစ်၊ ဇန်န၀ါရီလအထိ ကာလအတွင်း သဘာဝဘေးအန္တရာယ် ၂၄၆ ကြိမ် ဖြစ်ပွားခဲ့ပြီး ပျမ်းမျှအားဖြင့် ရှမ်းပြည်နယ်သည် တစ်လလျှင် ရက် ပေါင်း ၂၀ ခန့် သဘာဝဘေး အန္တရာယ် ဒဏ်ကို ခံစားနေရကြောင်း သဘာဝဘေး အန္တရာယ်ဆိုင်ရာ စီမံခန့်ခွဲမှု ဦးစီးဌာန၊ ညွှန်ကြားရေးမှူး ဦးစိုးနိုင်က ပြောကြားခဲ့သည်။
.
ရှမ်းပြည်နယ်အတွင်းမှာ ၂၀၁၈ ဧပြီလက စပြီး ၂၀၁၉ ဇန်န၀ါရီလအထိ ၁၀ လတာအတွင်းမှာ ဘေးအန္တရာယ်ပေါင်း ၂၄၆ ကြိမ် ဖြစ်ပွားခဲ့ပါတယ်။ တစ်နှစ်မှာ ၃၆၅ ရက်ဆိုတော့ အခုက ရက် ၃၀၀ ၀န်းကျင်ပဲ ရှိသေးတယ်။ ဖြစ်ပွားတာက ၂၄၆ ကြိမ်ဆိုတော့ ရက်ပေါင်း ၃၀ မှာ ရက် ၂၀ ကတော့ ဘေးအန္တရာယ် ဖြစ်ပွားနေတာပေါ့။ အဲဒီ ၁၀ လအတွင်းမှာ အိမ်ထောင်စုပေါင်း ၁၁၀၀၀ ကျော် ဘေးအန္တရာယ် ခံစားနေရတာ ဖြစ်ပါတယ်။ လူဦးရေကတော့ ၄၀၀၀၀ နီးပါး ရှိပါတယ်။ ဒီကာလအတွင်းမှာ သဘာဝဘေးကြောင့် ထိခိုက်သေဆုံး ခဲ့ရတဲ့ လူဦးရေကတော့ ၇၂ ဦး ရှိပြီး ဒဏ်ရာ ရရှိသူကတော့ ၉၇ ဦး ရှိပါတယ်ဟု ဦးစိုးနိုင်က ကမ္ဘောဇတိုင်းသို့ ပြောကြားခဲ့သည်။
.
ဖြစ်ပွားခဲ့သည့် သဘာဝဘေးအန္တရာယ်များမှာ မီးဘေး ၄၀ ကြိမ်၊ လေပြင်းဘေး ၈၇ ကြိမ်၊ မြေပြိုဘေး ၅ ကြိမ်၊ မိုးကြိုးဘေး ၆ ကြိမ် ရေဘေး ၁၉ ကြိမ် မိုင်းနင်းမိမှု ၃၀ ကြိမ်၊ တိုက်ပွဲရှောင် စစ်ဘေး ၅၂ ကြိမ်၊ အခြား ဘေးအန္တရာယ် ဖြစ်ပွားမှု ၇ ကြိမ် ဖြစ်ပွားခဲ့ပြီး အိမ်ခြေ ၁၆၄၇ လုံး၊ အိမ်ထောင်စု ၁၁၀၄၀ စုနှင့် လူဦးရေ ၃၈၇၂၆ ဦး သဘာဝဘေးဒဏ် ခံစားခဲ့ရကာ လူဦးရေ ၇၂ ဦး သေဆုံးခဲ့ပြီး ၉၇ ဦး ထိခိုက် ဒဏ်ရာများ ရရှိခဲ့ကြောင်း သိရသည်။
.
ယင်းကဲ့သို့ သဘာဝဘေး ဖြစ်ပွားမှုကြောင့် တန်ဖိုးငွေ ၂၂၀၁၈၈၆၉၀ ကျပ် ဆုံးရှုံးခဲ့ပြီး ရှမ်းပြည်နယ် ဘေး အန္တရာယ်ဆိုင်ရာ စီမံခန့်ခွဲမှု ဦးစီးဌာနမှ ၂၈၃၂၄၂၅၆၀ ကျပ် ထောက်ပံ့ပေးအပ်ခဲ့ကာ ၂၀၁၇-၁၈ ခုနှစ်မှ ယနေ့အထိ အမျိုးသား သဘာဝဘေး စီမံခန့်ခွဲမှု ကော်မတီ ရန်ပုံငွေမှ ရှမ်းပြည်နယ်အတွင်းရှိ သဘာဝဘေးအန္တရာယ် လျော့ပါးရေး လုပ်ငန်းများအတွက် ငွေကျပ် သန်း ၁၀၀၀ ကျော် ထောက်ပံ့ပေးအပ်ပြီး ဖြစ်ကြောင်းလည်း သိရသည်။
.

အလားတူ ၂၀၁၇-၁၈ ဘဏ္ဍာနှစ်တွင် ရှမ်းပြည်နယ်အတွင်း၌ မီးဘေး ၈၄ ကြိမ်၊ လေပြင်းဘေး ၅၅ ကြိမ်၊ မြေပြိုဘေး ၁၄ ကြိမ်၊ မိုးကြိုးဘေး ၁၁ ကြိမ်၊ မိုးသီးကြွေဘေး ၁ ကြိမ်၊ ရေဘေး ၁ ကြိမ်၊ မိုင်းနင်းမိမှု ၃၉ ကြိမ်၊ တိုက်ပွဲရှောင် စစ်ဘေး ၆၀ ကြိမ် အခြားသော ဘေးအန္တရာယ် ဖြစ်ပွားမှု ၆ ကြိမ် ဖြစ်ပွားခဲ့ပြီး အိမ် ခြေ ၈၇၀ လုံး၊ အိမ်ထောင်စု ၁၀၈၄၅ စု နှင့် လူဦးရေ ၅၅၄၆၀ ဦး သဘာဝဘေးဒဏ် ခံစားခဲ့ရကာ လူဦးရေ ၇၄ ဦး သေဆုံးခဲ့ပြီး ၁၂၃ ဦး ထိခိုက် ဒဏ်ရာ ရရှိခဲ့ကာ တန်ဖိုးငွေ ၃၉၁၁၇၉၉၁၀ ကျပ် ထိခိုက်ပျက်စီး ဆုံးရှုံးခဲ့ပြီး ရှမ်းပြည်နယ်ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာနမှ ၈၄၁၁၅၇၁၆၇ ကျပ် ထောက်ပံ့ပေး အပ်ခဲ့ကြောင်း သိရသည်။
.

ရှမ်းပြည်နယ်တွင် သောက်သုံးရေ ရှားပါးခြင်း၊ မိုးခေါင်ခြင်းများအတွက် ကြိုတင်ကာကွယ်ရန် မြေအောက်ရေ ရရှိမှု အခက်အခဲဆုံးဒေသ တစ်ခုဖြစ်သော ဓနုကိုယ်ပိုင်အုပ်ချုပ် ခွင့်ရဒေသ ပင်းတယမြို့နယ်နှင့် ရွာငံမြို့နယ်များတွင် မိုးရေကို စနစ်တကျ သိုလှောင်၍ ထိန်းသိမ်းတတ်စေရန် ပညာပေး ဟောပြောပွဲများ ပြုလုပ်ခဲ့ခြင်း၊ မိုးရာသီ၌ ဖြစ်ပွားတတ်သော ရေဘေး၊ မီးဘေးနှင့် လေဘေး အန္တရာယ်များကို ကြိုတင်ကာကွယ်နိုင်ရန် တစ်လလျှင် ရက် ၂၀ ခန့် ကွင်းဆင်းစစ်ဆေး အသိပညာပေး လုပ်ငန်းများ ဆောင်ရွက်လျက် ရှိကြောင်း သိရသည်။

No comments:

Post a Comment